महाराष्ट्र शूटिंग लीगमध्ये पिंपरी-चिंचवडच्या युवा नेमबाजांची चमक; एक्सलन्स क्लबने घडवली नव्या पिढीची आशा

पुणे : Pune येथे १७ ते १९ एप्रिल दरम्यान पार पडलेल्या पहिल्या महाराष्ट्र शूटिंग लीगमध्ये Excellence Shooting Sports Club च्या युवा नेमबाजांनी दमदार कामगिरी करत पिंपरी-चिंचवडचे नाव राज्यभर उज्ज्वल केले. राज्यातील नामांकित आणि आंतरराष्ट्रीय स्तरावर पदक पटकावलेल्या खेळाडूंमध्ये स्थानिक खेळाडूंनी केलेली चमकदार कामगिरी विशेष ठरली.
या प्रतिष्ठेच्या स्पर्धेत महाराष्ट्रातील १८ जिल्ह्यांतील १४४ खेळाडूंनी सहभाग घेतला होता. राष्ट्रीय आणि आंतरराष्ट्रीय स्तरावरील अनुभवी नेमबाजांसोबत स्पर्धा करताना पिंपरी-चिंचवडच्या युवा खेळाडूंनी केवळ सहभाग नोंदवला नाही, तर स्वतःची वेगळी ओळख निर्माण केली.
तेजस वाघेरे याने १० मीटर एअर पिस्टल प्रकारात ‘आम्ही पुणेकर’ संघाचे प्रतिनिधित्व करत कांस्यपदक पटकावले. दडपणाच्या क्षणी शांतता आणि अचूक निशाणा राखत त्याने आपली क्षमता सिद्ध केली.
तर गोजिरी घाडगे हिने १० मीटर एअर रायफल प्रकारात ‘अमरावती धुरंधर’ संघाकडून खेळताना ८९ पैकी ५५ अचूक हिट्स नोंदवत ‘बेस्ट रायफल शूटर’ हा किताब पटकावला. तिच्या या कामगिरीमुळे तिच्या संघालाही सर्वोत्कृष्ट रायफल शूटर संघ म्हणून गौरव मिळाला.
या दोन्ही खेळाडूंच्या यशामागे Excellence Shooting Sports Club चे संचालक आणि प्रशिक्षक सौरभ साळवणे यांचे मोलाचे मार्गदर्शन लाभले. साळवणे यांनी या स्पर्धेदरम्यान वर्धा वॉरियर्स संघाचे व्यवस्थापक आणि प्रशिक्षक म्हणूनही जबाबदारी सांभाळली.
“तरुण खेळाडूंना अशा व्यासपीठावर खेळण्याची संधी मिळणे हे पदकांपेक्षा खूप मोठे असते. यातून त्यांना दडपण कसे हाताळायचे, मानसिकदृष्ट्या मजबूत कसे राहायचे आणि मोठ्या स्तरावर आपणही खेळू शकतो हा आत्मविश्वास मिळतो,” असे सौरभ साळवणे यांनी सांगितले.
त्यांच्या मते, अशा लीगमुळे नवोदित खेळाडूंना केवळ स्पर्धा नाही तर मोठ्या खेळाडूंना जवळून पाहण्याची संधी मिळते.
“जेव्हा आपल्या शहरातील एखादा मुलगा किंवा मुलगी राज्यातील मोठ्या नेमबाजांमध्ये उभा राहून उत्कृष्ट कामगिरी करतो, तेव्हा इतर मुलांनाही वाटू लागते की आपणही हे करू शकतो. हाच खरा या लीगचा फायदा आहे,” असे साळवणे म्हणाले.
ते पुढे म्हणाले,
“अनेक मुलांमध्ये नैसर्गिक प्रतिभा असते, पण योग्य संधी नसते. महाराष्ट्र शूटिंग लीगसारख्या स्पर्धा त्यांना व्यासपीठ, ओळख आणि पुढे जाण्याची प्रेरणा देतात. एका चांगल्या कामगिरीमुळे एखाद्या खेळाडूचा संपूर्ण आत्मविश्वास बदलू शकतो.”
पिंपरी-चिंचवडमध्ये नेमबाजीसारख्या अचूकतेच्या खेळाकडे तरुणांचा वाढता कल दिसत असून, या यशामुळे अनेक नवोदित खेळाडूंना नवी दिशा मिळणार असल्याचे मानले जात आहे.
“चॅम्पियन तयार करणे ही एक गोष्ट आहे; पण त्या चॅम्पियनमुळे पुढची पिढी प्रेरित होणे ही त्याहून मोठी गोष्ट आहे,” असेही साळवणे यांनी नमूद केले.
या स्पर्धेत मिळवलेले पदक आणि सन्मान हे केवळ दोन खेळाडूंचे यश नसून, पिंपरी-चिंचवडमधील नव्या नेमबाजी संस्कृतीची दमदार सुरुवात मानली जात आहे.