नाशिक : मुसळधार पावसामुळे गोदावरी नदीला पूर आला असताना एका तरुणाने जीव धोक्यात घालून पुराच्या पाण्यात स्टंट करण्याचा प्रयत्न केला. या प्रकारामुळे घटनास्थळी उपस्थित नागरिकांमध्ये एकच खळबळ उडाली.
मिळालेल्या माहितीनुसार, तरुण पुराच्या पाण्यात उतरून स्टंटबाजी करत होता. सुदैवाने तो सुरक्षितपणे बाहेर आला. मात्र, त्याच्या बेजबाबदार वर्तनामुळे संतप्त झालेल्या पोलिसांनी त्याला तात्काळ ताब्यात घेत चांगलाच दम भरला. या घटनेचा व्हिडिओ सोशल मीडियावर मोठ्या प्रमाणात व्हायरल होत आहे.
पूरस्थितीत जीव धोक्यात घालून अशा प्रकारच्या स्टंटबाजीमुळे स्वतःचा तसेच बचाव पथकांचाही जीव धोक्यात येऊ शकतो. त्यामुळे नागरिकांनी पूरग्रस्त भागात जाणे टाळावे, नदी-नाल्यांच्या परिसरापासून दूर राहावे आणि प्रशासनाच्या सूचनांचे काटेकोरपणे पालन करावे, असे आवाहन पोलिस आणि प्रशासनाकडून करण्यात आले आहे.
सध्या नाशिकसह राज्यातील अनेक भागांत मुसळधार पाऊस सुरू असून नदी-नाले दुथडी भरून वाहत आहेत. अशा परिस्थितीत कोणतीही जीवघेणी स्टंटबाजी टाळण्याचे आवाहन प्रशासनाने पुन्हा एकदा केले आहे.
