पिंपरी, दि. १९ (प्रतिनिधी) – रावेत येथील किवळे रोडवर गुंडा विरोधी पथकाने सापळा रचून दोन सराईत गुन्हेगारांना अटक केली आहे. त्यांच्याकडून देशी बनावटीचे पिस्तुल आणि दोन जिवंत काडतुसे हस्तगत करण्यात आली आहेत. ही कारवाई शुक्रवारी (दि. १७ एप्रिल) रोजी रात्री साडेअकरा वाजताच्या सुमारास करण्यात आली.
आशिष दत्तात्रय भालेराव (वय २८, रा. साईनगर, देहूरोड) आणि शुभम उर्फ किट्टु दीपक गायकवाड (वय २३, रा. किवळे गावठाण, देहूरोड) अशी अटक केलेल्या आरोपींची नावे आहेत. तसेच सनी सिंग (रा. मध्यप्रदेश) याच्या विरोधातही गुन्हा दाखल केला आहे. पोलीस अंमलदार शुभम तानाजी कदम (गुंडा विरोधी पथक, गुन्हे शाखा) यांनी शनिवारी (दि. १८ एप्रिल) रोजी या प्रकरणी रावेत पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, रावेत येथील गिनी विवांता सोसायटीसमोर आरोपी हे शस्त्रबंदी आदेशाचे उल्लंघन करून देशी बनावटीची ७२ हजार रुपये किंमतीचे लोखंडी पिस्तुल आणि दोन जिवंत काडतुसे बाळगून असताना मिळून आले. पोलीस आयुक्तांनी लागू केलेल्या आदेशाचा भंग केल्याप्रकरणी त्यांच्यावर आर्म्स ॲक्टनुसार कारवाई करण्यात आली आहे. या प्रकरणाचा पुढील तपास रावेत पोलीस ठाण्यातील सहाय्यक पोलीस निरीक्षक देशमुख करत आहेत.
