ताथवडे येथे भीषण अपघात; उभ्या ट्रकवर टेम्पो ट्रॅव्हलर आदळली अग्निशमन दलाने पत्रे कापून जखमीला काढले बाहेर; पहाटेच्या सुमारास थरार
पिंपरी-चिंचवड :
मुंबई-बेंगलोर महामार्गावर ताथवडे येथे उभ्या असलेल्या ट्रकवर टेम्पो ट्रॅव्हलर पाठीमागून जोरदार आदळली. या भीषण अपघातात एक प्रवासी गंभीर जखमी होऊन वाहनातच अडकला होता. पिंपरी-चिंचवड अग्निशमन दलाच्या जवानांनी अत्यंत कौशल्याने या प्रवाशाची सुटका केली. ही घटना बुधवारी (दि. ६) पहाटे पावणे पाच वाजताच्या सुमारास घडली.
रवींद्र राजगुरू (वय ५५, रा. उरुळी देवाची) असे या अपघातात गंभीर जखमी झालेल्या व्यक्तीचे नाव आहे. पोलिसांनी दिलेल्या माहितीनुसार, एमएच १६ बीसी ७४७५ क्रमांकाचा ट्रक ताथवडे येथील इंदिरा कॉलेजजवळ महामार्गाच्या कडेला उभा होता. दरम्यान, मुंबईहून पुण्याच्या दिशेने निघालेली टेम्पो ट्रॅव्हलर (एमएच 10 डीटी 7677) पाठीमागून या ट्रकवर जोरात धडकली.
केबिनमध्ये अडकला होता पाय
धडक इतकी भीषण होती की टेम्पो ट्रॅव्हलरच्या दर्शनी भागाचा चक्काचूर झाला. यामध्ये समोर बसलेले रवींद्र राजगुरू हे गंभीर जखमी झाले. त्यांच्या अंगावर वाहनाचे पत्रे आल्याने ते आतच अडकून पडले होते. घटनेची माहिती मिळताच रहाटणी अग्निशमन केंद्राचा एक बंब तातडीने घटनास्थळी दाखल झाला. जवानांनी लोखंडी कटर आणि इतर साहित्याचा वापर करून वाहनाचे पत्रे बाजूला केले. अवघ्या काही मिनिटांत राजगुरू यांना सुखरूप बाहेर काढण्यात आले.
चालक थोडक्यात बचावला
सुदैवाने या अपघातात टेम्पो ट्रॅव्हलरचा चालक थोडक्यात बचावला असून त्याला कोणतीही इजा झालेली नाही. जखमी रवींद्र राजगुरू यांना तात्काळ उपचारासाठी जवळच्या खासगी रुग्णालयात दाखल करण्यात आले आहे. पहाटेच्या वेळी चालकाला डुलकी लागल्याने हा अपघात झाला असावा, असा प्राथमिक अंदाज व्यक्त केला जात आहे. हिंजवडी पोलीस या प्रकरणाचा अधिक तपास करत आहेत.
