pimpri chinchwad-पावसाळ्यापूर्वी पिंपरी-चिंचवड महानगरपालिका सज्ज; आयुक्तांकडून ‘ॲक्शन प्लॅन’ जाहीर
(pimpri chinchwad)-पावसाळ्यापूर्वी पिंपरी-चिंचवड महानगरपालिका सज्ज; आयुक्तांकडून ‘ॲक्शन प्लॅन’ जाहीर
नालेसफाई आणि धोकादायक होर्डिंग्जवर आयुक्तांचा कडक इशारा; आपत्ती निवारणासाठी ‘क्विक रिस्पॉन्स टीम’ तैनात
पिंपरी-चिंचवड :
येत्या पावसाळ्याच्या पार्श्वभूमीवर पिंपरी-चिंचवड महानगरपालिकेने कंबर कसली आहे. शहरात कुठेही पाणी साचणार नाही याची दक्षता घेण्याचे स्पष्ट आदेश आयुक्त डॉ. विजय सूर्यवंशी यांनी दिले आहेत. “पावसाळ्यापूर्वी सूक्ष्म नियोजन करा आणि आपत्कालीन यंत्रणा सज्ज ठेवा,” अशा सूचना त्यांनी प्रशासनाला दिल्या.
पिंपरी येथील मुख्य प्रशासकीय भवनात गुरुवारी मान्सूनपूर्व तयारीचा आढावा घेण्यात आला. यावेळी आयुक्तांनी शहरातील विविध विभागांच्या कामांचा सविस्तर आढावा घेतला.
पाणी साचणाऱ्या जागांवर ‘वॉच’
शहरात ज्या ठिकाणी दरवर्षी पावसाचे पाणी साचते, अशा ठिकाणांची तातडीने ओळख पटवा. तिथे कायमस्वरूपी उपाययोजना करा. नालेसफाईची कामे वेळेत पूर्ण झालीच पाहिजेत. पावसाळ्यापूर्वी शहराची जलनिस्सारण यंत्रणा सक्षम करा, असे आदेश आयुक्तांनी दिले. नदीकाठच्या पूरप्रवण भागातील नागरिकांच्या स्थलांतराचे नियोजन आतापासूनच पूर्ण करण्याचे त्यांनी बजावले.
होर्डिंग्ज आणि धोकादायक इमारतींवर कारवाई
शहरातील अनधिकृत आणि धोकादायक होर्डिंग्ज तत्काळ काढून टाकण्याचे निर्देश देण्यात आले आहेत. होर्डिंगधारकांनी नियमांचे उल्लंघन केल्यास कठोर दंडात्मक कारवाई केली जाईल. तसेच, धोकादायक इमारतींचे सर्वेक्षण करून तेथील नागरिकांना सुरक्षित स्थळी हलवण्याच्या सूचनाही देण्यात आल्या आहेत.
आरोग्य आणि रुग्णालय व्यवस्था
पावसाळ्यात साथीचे रोग पसरू नयेत म्हणून आरोग्य विभागाने आत्तापासूनच सतर्क राहावे. सर्व भागांत नियमित फवारणी आणि धुरीकरण करावे. महापालिकेच्या सर्व रुग्णालयांमध्ये अखंडित वीज पुरवठा असावा. आपत्कालीन परिस्थितीसाठी रुग्णालयांत पुरेसे बेड आरक्षित ठेवावेत, असेही आयुक्त म्हणाले.
’क्विक रिस्पॉन्स टीम’ची स्थापना
पावसाळ्यात झाडपडीच्या घटना किंवा पाणी साचल्यास तातडीने मदत पोहचवण्यासाठी ‘क्विक रिस्पॉन्स टीम’ (QRT) कार्यरत राहतील. यात अग्निशमन, आरोग्य, विद्युत आणि उद्यान विभागाच्या कर्मचाऱ्यांचा समावेश असेल. रस्त्यांवरील खड्डे पावसाळ्यापूर्वी बुजवून वाहतूक सुरळीत ठेवण्याचे आदेश आयुक्तांनी दिले आहेत.
फुटपाथ होणार अतिक्रमणमुक्त
या बैठकीत ‘अतिक्रमणमुक्त फुटपाथ’ पंधरवड्याचाही आढावा घेण्यात आला. पादचाऱ्यांचे मार्ग मोकळे ठेवण्यासाठी कोणत्याही दबावाला बळी न पडता कठोर कारवाई करण्याचे निर्देश आयुक्तांनी सर्व क्षेत्रीय अधिकाऱ्यांना दिले.
बैठकीस उपस्थित प्रमुख अधिकारी:
या महत्त्वपूर्ण बैठकीला अतिरिक्त आयुक्त कुलदीप जंगम, तृप्ती सांडभोर, विक्रांत बगाडे, सहआयुक्त मनोज लोणकर, मुख्य अभियंता प्रमोद ओंभासे, आरोग्य वैद्यकीय अधिकारी डॉ. लक्ष्मण गोफणे, वायसीएमचे अधिष्ठाता डॉ. राजेंद्र वाबळे, उपआयुक्त संदीप खोत, सहाय्यक आयुक्त तानाजी नरळे आणि मुख्य आपत्ती व्यवस्थापन अधिकारी ओमप्रकाश बहिवाल यांच्यासह अन्य वरिष्ठ अधिकारी उपस्थित होते.
