पिंपरी-चिंचवड:
पुणे शहर आणि जिल्ह्यात मे महिन्याचा उत्तरार्ध चांगलाच तापू लागला आहे. मंगळवारी (दि. १९ मे) जिल्ह्याच्या विविध भागांत संमिश्र तापमानाची नोंद झाली असून, पुणे शहरातील मगरपट्टा परिसर ४१.१ अंश सेल्सिअस तापमानासह जिल्ह्यातील सर्वात उष्ण भाग ठरला आहे. दुसरीकडे, पिंपरी-चिंचवड औद्योगिकनगरी आणि लगतच्या डूडूळगाव परिसरात मात्र तापमानाचा पारा काहीसा नियंत्रणात राहिल्याने नागरिकांना उष्णतेच्या तीव्र लाटेपासून काहीसा दिलासा मिळाला आहे.
हवामान विभागाने जाहीर केलेल्या आकडेवारीनुसार, पिंपरी-चिंचवड शहरातील चिंचवड भागात ३५.५ अंश सेल्सिअस इतक्या मर्यादित कमाल तापमानाची नोंद झाली आहे. मात्र, महापालिका हद्दीतील डूडूळगाव परिसरात पारा ३६.३ अंश सेल्सिअसवर गेल्याने तिथे काहीशी अधिक उष्णता जाणवली.
मगरपट्ट्यात सर्वाधिक दाहकता; बारामती दुसऱ्या क्रमांकावर
जिल्ह्यात एकीकडे चिंचवड आणि मावळचा परिसर तुलनेने शांत असताना, दुसरीकडे पुणे शहरातील पूर्व भाग आणि ग्रामीण भागात उन्हाचा कडाका प्रचंड होता. मगरपट्टा (४१.१ अंश) पाठोपाठ बारामतीमध्ये ३९.६ अंश सेल्सिअस तापमानाची नोंद झाली. तसेच आंबेगाव, पाषाण, हवेली आणि दौंड भागातही तापमान ३७ अंशाच्या पुढे राहिल्याने दुपारच्या वेळी रस्ते ओस पडले होते.
मावळ पॅटर्न: तळेगाव, माळिनमध्ये सुखद वातावरण
पिंपरी-चिंचवडकरांसाठी दिलासादायक बातमी असतानाच, लगतच्या मावळ आणि डोंगराळ भागातील वातावरण अधिकच सुसह्य असल्याचे दिसून आले. मावळमधील तळेगाव येथे ३४.५ अंश सेल्सिअस तापमानाची नोंद झाली, तर जिल्ह्याच्या शेवटच्या टोकावर असलेल्या माळीण आणि निमगिरी भागात पारा अवघ्या ३२.८ अंशांवर स्थिरावला होता.
थोडक्यात काय तर…
पुणे आणि बारामतीकरांना आज उन्हाच्या तीव्र झळा सोसाव्या लागल्या असताना, पिंपरी-चिंचवड आणि मावळ परिसराने मात्र भौगोलिक वातावरणामुळे या मे हिटच्या काळातही स्वतःला बऱ्यापैकी ‘कूल’ ठेवले आहे. तरीही आगामी दिवसांत पारा वाढण्याची शक्यता असल्याने नागरिकांनी दुपारच्या वेळी काळजी घ्यावी, असे आवाहन प्रशासनाने केले आहे.
जिल्ह्यातील प्रमुख ठिकाणची तापमान स्थिती (अंश सेल्सिअसमध्ये):
मगरपट्टा ४१.१ राजगुरुनगर ३५.७
बारामती ३९.६ लव्हाळे ३५.५
आंबेगाव ३७.२ चिंचवड ३५.५
पाषाण ३७.१ शिरूर ३५.३
हवेली ३७.१ हडपसर ३५.०
दौंड ३७.१ नारायणगाव ३४.८
शिवाजीनगर ३६.८ तळेगाव (मावळ) ३४.५
डूडूळगाव ३६.३ गिरिवन ३४.२
कोरेगाव पार्क ३६.२ बल्लाळवाडी ३४.०
वडगावशेरी ३५.८ माळिन ३२.८
एनडीए ३५.७ निमगिरी ३२.८
