पिंपरी, दि. २९ (प्रतिनिधी) – स्मशानभूमी परिसरातील लाकूड वखारीजवळ गांजाची विक्री करणाऱ्या एका इसमाला पोलिसांनी अटक केली आहे. ही कारवाई बुधवारी (२७ मे) सायंकाळी सहा वाजेच्या सुमारास गोपाळ जगताप यांच्या घरासमोर, थेरगाव येथे करण्यात आली.
अशोक संतोष आडवाणी (वय २८, रा. थेरगाव) याला अटक केली आहे. या प्रकरणी पोलीस शिपाई सदानंद रुद्राक्षे यांनी गुरुवारी (दि. २८ मे) रोजी काळेवाडी पोलीस ठाण्यात फिर्याद दिली आहे. पोलिसांनी दिलेल्या माहितीनुसार, आरोपी बेकायदेशीररीत्या गांजाची विक्री करण्यासाठी तिथे थांबला होता. त्याच्या ताब्यातून ३ किलो ९१५ ग्रॅम वजनाचा गांजा, एक मोबाइल आणि मोपेड दुचाकी असा एकूण तीन लाख ३० हजार ७५० रुपये किमतीचा मुद्देमाल जप्त करण्यात आला आहे. काळेवाडी पोलीस याबाबत अधिक तपास करत आहेत.
