पिंपरी-चिंचवड :
उघड्यावर जैववैद्यकीय (बायो-मेडिकल) कचरा टाकून पर्यावरण आणि नागरिकांच्या आरोग्याशी खेळणाऱ्यांवर पिंपरी-चिंचवड महापालिकेने कठोर कारवाईचा बडगा उगारला आहे. ‘क’ क्षेत्रीय कार्यालयाच्या हद्दीतील चिखली येथे उघड्यावर धोकादायक कचरा टाकल्याप्रकरणी महापालिकेच्या आरोग्य पथकाने संबंधितांवर ३५ हजार रुपयांची दंडात्मक कारवाई केली आहे. महापालिकेच्या या धडक कारवाईमुळे बेजबाबदार रुग्णालये आणि प्रयोगशाळा चालकांचे धाबे दणाणले आहेत.
नेमकी काय आहे घटना?
’क’ क्षेत्रीय कार्यालयांतर्गत प्रभाग क्रमांक २ मधील सेक्टर १३, चिखली येथे काही अज्ञात/जबाबदार घटकांनी उघड्यावर मोठ्या प्रमाणावर जैववैद्यकीय कचरा फेकला होता. हा प्रकार निदर्शनास येताच महापालिका प्रशासनाने याची गंभीर दखल घेतली. बायो-मेडिकल कचऱ्याची अशा प्रकारे अयोग्य विल्हेवाट लावल्याने परिसरात संसर्गजन्य आजार पसरण्याचा आणि पर्यावरण दूषित होण्याचा मोठा धोका निर्माण झाला होता. त्यामुळे आरोग्य पथकाने तातडीने घटनास्थळी धाव घेत तपास केला आणि नियमांचे उल्लंघन करणाऱ्यांवर ही दंडात्मक कारवाई केली.
वरिष्ठांच्या निर्देशानुसार धडक मोहीम
महानगरपालिका आयुक्त डॉ. विजय सूर्यवंशी आणि अतिरिक्त आयुक्त कुलदीप जंगम यांच्या थेट निर्देशानुसार ही मोहीम राबवण्यात आली. उप आयुक्त डॉ. प्रदीप ठेंगल, सहाय्यक आयुक्त किरणकुमार मोरे आणि क क्षेत्रीय अधिकारी अजिंक्य येळे यांच्या थेट मार्गदर्शनाखाली आरोग्य विभागाच्या पथकाने ही धडक कारवाई पूर्ण केली.
कारवाई आणखी तीव्र करणार: डॉ. प्रदीप ठेंगल (उप आयुक्त)
“जैववैद्यकीय कचऱ्याची नियमबाह्य विल्हेवाट लावणे हा गंभीर गुन्हा असून तो सार्वजनिक आरोग्यासाठी अत्यंत घातक आहे. यापुढे जैववैद्यकीय कचरा व्यवस्थापन नियमांचे उल्लंघन करणाऱ्यांविरुद्धची दंडात्मक कारवाई आणखी तीव्र केली जाईल.”
शास्त्रोक्त विल्हेवाट बंधनकारक: अजिंक्य येळे (क्षेत्रीय अधिकारी)
“शहरातील स्वच्छता आणि नागरिकांचे आरोग्य राखण्यासाठी बायो-मेडिकल वेस्टची शास्त्रोक्त पद्धतीनेच विल्हेवाट लावणे सर्वांना बंधनकारक आहे. नियम मोडणाऱ्यांवर यापुढेही सातत्याने आणि कठोर कारवाई केली जाईल.”
या पथकाने केली कारवाई
’क’ क्षेत्रीय कार्यालयाचे सहाय्यक आरोग्य अधिकारी योगेश फल्ले आणि मुख्य आरोग्य निरीक्षक वैभव घोळवे यांच्या नेतृत्वाखाली आरोग्य निरीक्षक राहुल राखपसरे, आरोग्य सहाय्यक अमोल घुसर तसेच महाराष्ट्र सुरक्षा बलाच्या (MSF) जवानांच्या पथकाने प्रत्यक्ष जागेवर जाऊन ही धडक कारवाई केली.
महापालिकेचे आवाहन
जैववैद्यकीय कचऱ्याची विल्हेवाट लावण्यासाठी शासनाचे कडक नियम आहेत. वैद्यकीय क्षेत्राशी संबंधित संस्थांनी स्वतःच्या फायद्यासाठी नागरिकांचे आरोग्य धोक्यात घालू नये. पर्यावरण संरक्षण आणि सार्वजनिक आरोग्य सुरक्षित ठेवण्यासाठी सर्व संबंधित संस्थांनी आणि नागरिकांनी नियमांचे काटेकोर पालन करावे, असे आवाहन महापालिका प्रशासनाने केले आहे.
