शाहूनगरमध्ये झाडाची भलीमोठी फांदी रस्त्यावर कोसळली; वाहतूक काही काळ ठप्प चिखली अग्निशामक दलाची तातडीची धाव; मोठा अनर्थ टळला
पिंपरी–चिंचवड :
शाहूनगर परिसरातील बीआरटी मार्गालगत रविवारी रात्री झाडाची मोठी फांदी अचानक तुटून रस्त्यावर कोसळल्याने काही काळ वाहतूक विस्कळीत झाली. रात्री पावणेदहा वाजण्याच्या सुमारास ही घटना घडली. सुदैवाने फांदी कोसळली त्यावेळी कोणतेही वाहन किंवा नागरिक तिच्या खाली नसल्याने मोठी दुर्घटना टळली.
घटनेची माहिती मिळताच चिखली अग्निशामक केंद्रातील जवानांनी तातडीने घटनास्थळी धाव घेतली. रस्त्यावर पडलेली मोठी फांदी हटविण्यासाठी युद्धपातळीवर काम करण्यात आले. त्यामुळे काही वेळातच बीआरटी मार्गावरील वाहतूक सुरळीत करण्यात यश आले.
या बचाव मोहिमेत लायडिंग फायरमन बाबुशा गवारी, वाहन चालक दिनेश येळवे, फायरमन विनेश वाटकाटे, सोहन तुकदेव, विनोद नरवडे तसेच ट्रेनी फायरमन बळीराम भोजने आणि किरण कर्णे यांनी सहभाग घेतला. जवानांनी तत्परता दाखवत फांदीचे तुकडे करून रस्ता मोकळा केला.
घटनेनंतर काही काळ परिसरात वाहतुकीची कोंडी निर्माण झाली होती. मात्र अग्निशामक दलाच्या जलद प्रतिसादामुळे परिस्थिती नियंत्रणात आली. या घटनेत कोणतीही जीवित अथवा वित्तहानी झाली नसल्याची माहिती मिळाली आहे.
पावसाळ्याच्या पार्श्वभूमीवर शहरातील जुनी व मोठी झाडे धोकादायक ठरण्याची शक्यता असते. त्यामुळे अशा झाडांची नियमित छाटणी व तपासणी करण्याची मागणी नागरिकांकडून करण्यात येत आहे.
चिखली अग्निशामक दलाच्या तत्परतेमुळे संभाव्य मोठा अपघात टळला असून नागरिकांनी जवानांच्या कार्याचे कौतुक केले आहे.
