पिंपरी-चिंचवड :
मोशी येथील वेस्ट टू एनर्जी प्रकल्पात कचऱ्याचा प्रचंड ढिगारा कोसळून नऊ जणांचा दुर्दैवी मृत्यू झाल्यानंतर पिंपरी-चिंचवड महापालिका प्रशासनाने कठोर भूमिका घेतली आहे. या दुर्घटनेची गंभीर दखल घेत महापालिका आयुक्त डॉ. विजय सूर्यवंशी यांनी संपूर्ण घटनेची सखोल चौकशी करण्याचे आदेश दिले आहेत. तसेच महापालिकेच्या पर्यावरण विभागासह संबंधित कंत्राटदार कंपनी अँटोनी लारा रिन्युएबल्स यांना तातडीने कारणे दाखवा नोटीस बजावण्याचे निर्देश देत निष्काळजीपणाला जबाबदार असणाऱ्यांवर कठोर कारवाईचे संकेत दिले आहेत.
दुर्घटनेनंतर रविवारी आयुक्त डॉ. विजय सूर्यवंशी यांच्या अध्यक्षतेखाली महापालिकेतील वरिष्ठ अधिकाऱ्यांची तातडीची बैठक घेण्यात आली. बैठकीला अतिरिक्त आयुक्त कुलदीप जंगम, तृप्ती सांडभोर, विक्रांत बगाडे, सहआयुक्त मनोज लोणकर यांच्यासह विविध विभागांचे प्रमुख अधिकारी उपस्थित होते. दुर्घटनेची कारणे, सुरक्षा उपाययोजना, कचरा व्यवस्थापनाची अंमलबजावणी आणि भविष्यात अशा घटना टाळण्यासाठी आवश्यक उपाययोजनांवर सविस्तर चर्चा करण्यात आली.
८ जुलै रोजी दुपारी मोशी कचरा डेपोतील वेस्ट टू एनर्जी प्रकल्पाच्या प्रशासकीय इमारतीवर कचऱ्याचा डोंगर कोसळला. त्यावेळी इमारतीत आणि परिसरात एकूण २३ नागरिक होते. त्यापैकी पाच जण सुखरूप बाहेर पडले. त्यानंतर भारतीय सेना, एनडीआरएफ, पिंपरी-चिंचवड महापालिका, पीएमआरडीए अग्निशमन दल आणि पोलीस यंत्रणेने सलग ८४ तास संयुक्त बचावमोहीम राबवली. या मोहिमेत नऊ जणांना जीवदान मिळाले, तर नऊ जणांचा ढिगाऱ्याखाली दबून मृत्यू झाला.
या दुर्घटनेमागे निष्काळजीपणा, सुरक्षा नियमांचे उल्लंघन किंवा व्यवस्थापनातील त्रुटी कारणीभूत होत्या का, याचा आता तपास केला जाणार आहे. चौकशी अहवालानंतर दोषींवर प्रशासकीय आणि कायदेशीर कारवाई होण्याची शक्यता असून, या दुर्घटनेनंतर महापालिका प्रशासनाने जबाबदारी निश्चित करण्याच्या दिशेने निर्णायक पाऊल उचलल्याचे स्पष्ट झाले आहे.
