Pimpri-Chinchwad-अंमलीपदार्थ मुक्त शहरासाठी पोलिसांचा डिजिटल संवाद ४५ हजार नागरिकांचा सहभाग
पिंपरी, दि. २८ (प्रतिनिधी) – मुख्यमंत्री देवेंद्र फडणवीस यांच्या ‘अंमलीपदार्थमुक्त महाराष्ट्र’ अभियानाला अधिक प्रभावी करण्यासाठी पिंपरी-चिंचवड पोलीस आयुक्तालयाने डिजिटल माध्यमातून अभिनव उपक्रम राबविला. पोलीस आयुक्त विनय कुमार चौबे यांनी ‘एक्स’ (X) या सोशल मीडिया प्लॅटफॉर्मवर आयोजित ‘व्हर्च्युअल टाऊन हॉल’च्या माध्यमातून नागरिकांशी थेट संवाद साधत अंमली पदार्थांविरोधात जनजागृती केली. या उपक्रमाला तब्बल ४५ हजार नागरिक, विद्यार्थी आणि विविध क्षेत्रातील प्रतिनिधींनी उत्स्फूर्त प्रतिसाद दिला.
मंगळवारी सकाळी ११ ते १२.३० या वेळेत झालेल्या या ऑनलाइन संवादात शहरातील ८१९ शाळा, महाविद्यालये, औद्योगिक समूह, गृहनिर्माण संस्था, डॉक्टर व मेडिकल असोसिएशन, हॉटेल व्यावसायिक आणि विविध स्वयंसेवी संस्थांतील नागरिक सहभागी झाले होते.
संवादादरम्यान अंमली पदार्थांचे वाढते दुष्परिणाम, तरुणांमध्ये वाढणारे व्यसन, प्रतिबंधात्मक उपाययोजना, कायदेशीर कारवाई आणि संशयास्पद हालचालींची माहिती पोलिसांपर्यंत कशी पोहोचवावी, याबाबत नागरिकांनी विविध प्रश्न उपस्थित केले. पोलीस आयुक्त विनय कुमार चौबे यांनी प्रत्येक प्रश्नाचे सविस्तर उत्तर देत अंमली पदार्थांविरोधातील लढ्यात नागरिकांच्या सहभागाचे महत्त्व अधोरेखित केले.
यावेळी अंमली पदार्थांशी संबंधित माहिती देण्यासाठी पोलीस आयुक्तालयाने सुरू केलेल्या अँटी नार्कोटिक्स हेल्पलाइन क्रमांक ७७९८१००११२ चा वापर करण्याचे आवाहन करण्यात आले. नागरिकांनी कोणतीही संशयास्पद माहिती निर्भीडपणे पोलिसांना द्यावी, असेही सांगण्यात आले.
या उपक्रमाला पोलीस सहआयुक्त डॉ. शशिकांत महावरकर, अपर आयुक्त सारंग आवाड, सर्व पोलीस उपायुक्त, वरिष्ठ पोलीस निरीक्षक आणि अधिकारी उपस्थित होते.
डिजिटल माध्यमाचा प्रभावी वापर करून नागरिकांना थेट सहभागी करून घेणाऱ्या या उपक्रमामुळे अंमली पदार्थांविरोधातील जनजागृतीला नवे बळ मिळाले आहे. समाज आणि पोलीस यांच्या संयुक्त सहभागातूनच ‘अंमलीपदार्थमुक्त पिंपरी-चिंचवड’ हे उद्दिष्ट साध्य होईल, असा विश्वास पोलीस प्रशासनाने व्यक्त केला आहे.
