माणुसकीला काळिमा! अपघातातील जखमीला उपचाराऐवजी गाडीत टाकले, थेट शिक्रापूर हद्दीत मृतदेह फेकला; ४८ तासांत आरोपी अटकेत
पिंपरी-चिंचवड :
अपघातात गंभीर जखमी झालेल्या तरुणाला रुग्णालयात नेऊन उपचार करण्याऐवजी, त्याचा मृत्यू ओढवू शकतो हे माहीत असतानाही त्याला गाडीत टाकून पळ काढणाऱ्या आणि पुरावा नष्ट करण्यासाठी मृतदेह थेट शिक्रापूर पोलीस ठाण्याच्या हद्दीत फेकून देणाऱ्या निर्दयी पिकअप चालकाला म्हाळुंगे एमआयडीसी पोलिसांनी ४८ तासांच्या आत बेड्या ठोकल्या आहेत. या धक्कादायक घटनेमुळे चाकण-म्हाळुंगे परिसरात तीव्र संताप व्यक्त होत आहे.
मेहबूब लकीब मोहम्मद शेख (वय ४०, रा. जवळा, ता. पारनेर, जि. अहिल्यानगर) असे अटक करण्यात आलेल्या आरोपी पिकअप चालकाचे नाव आहे. या अपघातात मनोज कुमार रामजी विश्वकर्मा (वय ३५, रा. खालुम्ब्रे, मूळ गाव – उत्तर प्रदेश) या निष्पाप तरुणाचा वेदनेने तडफडून मृत्यू झाला आहे.
नेमकी घटना काय घडली?
४ जून २०२६ रोजी सकाळी १०:०० वाजण्याच्या सुमारास चाकण-तळेगाव रोडवरील खालुम्ब्रे (ता. खेड) येथील एचपी पेट्रोल पंपासमोर मनोज कुमार हे रस्ता ओलांडत होते. त्याच वेळी एका भरधाव अज्ञात पिकअप गाडीने त्यांना जोराची धडक दिली. धडक बसल्याने मनोज कुमार गंभीर जखमी झाले. अपघात झाल्यानंतर पिकअप चालक खाली उतरला, त्याने जखमी मनोज यांना रस्त्यावरून उचलले आणि उपचाराच्या बहाण्याने स्वतःच्या गाडीत टाकून तो तिथून निघून गेला.
उपचार न करताच मृतदेह फेकून दिला
जखमी मनोज कुमार यांना तात्काळ वैद्यकीय उपचाराची गरज होती. मात्र, आरोपी चालक मेहबूब शेख याने त्यांना कोणत्याही रुग्णालयात दाखल केले नाही. वेळेत उपचार न मिळाल्यामुळे मनोज कुमार यांचा गाडीतच मृत्यू झाला. त्यानंतर आरोपीने स्वतःचा गुन्हा लपवण्यासाठी मनोज कुमार यांचा मृतदेह शिक्रापूर पोलीस ठाण्याच्या हद्दीत एका रस्त्यावर फेकून दिला आणि तो तिथून फरार झाला. याप्रकरणी महाळुंगे एमआयडीसी पोलीस ठाण्यात गुन्हा दाखल करण्यात आला होता.
सीसीटीव्ही फुटेज आणि पोलिसांची जलद कारवाई
घटनेचे गांभीर्य ओळखून पोलिसांनी तपास पथके रवाना केली. तपास पथकातील पोलीस नाईक काळे यांनी घटनास्थळावरील आणि परिसरातील सीसीटीव्ही कॅमेऱ्यांचे फुटेज बारकाईने तपासले. त्यामध्ये अपघातातील वाहन हे महिंद्रा बोलेरो पिकअप (क्र. MH-12 ZE 0779) असल्याचे निष्पन्न झाले. तांत्रिक विश्लेषणाच्या आधारे पोलिसांनी आरोपीचा माग काढत अवघ्या ४८ तासांत आरोपी चालक मेहबूब शेख याला अटक केली.
गुन्ह्यात वाढीव कलम; ९ जूनपर्यंत पोलीस कोठडी
आरोपीला आपल्या कृत्यामुळे समोरच्या व्यक्तीचा मृत्यू होऊ शकतो हे माहीत होते, तरीही त्याने जखमीला उपचाराविना गाडीत डांबून ठेवले. त्यामुळे पोलिसांनी या गुन्ह्यात भारतीय न्याय संहिता (BNS) २०२३ चे कलम १०५ (सदोष मनुष्यवध) हे वाढीव कलम लावले आहे. न्यायालयाने आरोपीला ९ जून २०२६ पर्यंत पोलीस कस्टडी मंजूर केली आहे.
सदरची कामगिरी पिंपरी-चिंचवड परिमंडळ-४ च्या पोलीस उप आयुक्त श्वेता खेडकर यांच्या मार्गदर्शनाखाली महाळुंगे पोलिसांनी केली असून, पुढील अधिक तपास पोलीस उपनिरीक्षक अनिस मुल्ला करीत आहेत.
