मुंबई-पुणे कनेक्टिंग लिंक बोगद्यात धावत्या कारवर दगड कोसळला; कारची काच फुटली, सुदैवाने जीवितहानी टळली
लोणावळा : मुंबई-पुणे एक्सप्रेसवेवरील कनेक्टिंग लिंक बोगद्यात धावत्या कारवर दगड पडल्याने कारची काच फुटून अपघात झाल्याची घटना आज (२९ जून) सायंकाळच्या सुमारास घडली. सुदैवाने या अपघातात कोणालाही दुखापत झालेली नाही.
पोलिसांनी दिलेल्या माहितीनुसार, आज सोमवार, दिनांक २९ जून २०२६ रोजी सायंकाळी ५:१७ वाजेच्या सुमारास मुंबई-पुणे कनेक्टिंग लिंक बोगदा क्रमांक दोनमध्ये (किमी १०/४००, पुणे बाजू) हा अपघात झाला. उचप्पा खतनाप्पा वरचल्ली (वय ५३ वर्ष, रा. खोपोली, जि. रायगड, धंदा- ट्रान्सपोर्ट) हे आपल्या ताब्यातील अर्टिगा कार (क्रमांक MH 46 CM 1989) घेऊन पुण्याच्या दिशेने जात होते. कार बोगद्यातून जात असताना अचानक गाडीच्या समोरील काचेवर दगड पडला. दगड पडल्याच्या आघातामुळे कारची काच जागीच फुटली.
या घटनेची माहिती सोशल मीडिया ग्रुपच्या माध्यमातून सायंकाळी ६:३० वाजता खंडाळा महामार्ग पोलीस केंद्राला मिळाली. माहिती मिळताच खंडाळा महामार्ग पोलीस केंद्राचे पोलीस उपनिरीक्षक (PSI) समीर कटपाळे आणि एम.एस.एफ (MSF) जवान सुरेश ढेरे यांनी सायंकाळी ६:४० वाजता तातडीने अपघातस्थळी भेट दिली.
हा अपघात केवळ वाहनाचे नुकसान करणारा (विना दुखापत) ठरला असून, सुदैवाने कार चालकासह इतर कोणीही जखमी झालेले नाही. अपघातानंतर कार चालक आपल्या वाहनासह पुढील प्रवासासाठी निघून गेले आहेत. कार चालक अपघातस्थळावरून कोणतीही तक्रार किंवा नोंद न करता निघून गेल्यामुळे, शासकीय नियमानुसार ‘E-DAR’ आणि ‘PM rahat’ पोर्टलवर या अपघाताची माहिती भरण्यात आलेली नाही, अशी माहिती खंडाळा महामार्ग पोलीस केंद्राचे पी.एस.आय. समीर कटपाळे यांनी दिली आहे.
