रस्त्याच्या विरुद्ध दिशेने रिक्षा घेऊन आल्याबाबत विचारणा केल्यामुळे चिडलेल्या रिक्षा चालकाने एका व्यक्तीला लोखंडी टामीने मारून जखमी केले. ही घटना रविवारी (१२ एप्रिल) रात्री १०.४५ वाजण्याच्या सुमारास पुनावळे येथील पुनावळे मल्टी स्पेशालिटी हॉस्पिटलसमोर घडली.
याबाबत प्रवीण प्रकाश कुंभार (३४, पुनावळे) यांनी रावेत पोलीस ठाण्यात फिर्याद दिली आहे. पोलिसांनी याप्रकरणी संतोष अशोक भोसले (२७, जांभे, मुळशी) याला अटक केली आहे.
पोलिसांनी दिलेल्या माहितीनुसार, फिर्यादी आपल्या कारमधून जात असताना आरोपी रिक्षा चालक विरुद्ध दिशेने रिक्षा घेऊन आला. फिर्यादीने त्याला ‘रॉन्ग साईड’ने का आला असे विचारले असता त्याने फिर्यादीला कारमधून खाली उतरवून शिवीगाळ केली आणि जिवे मारण्याची धमकी दिली. त्यानंतर रिक्षातील लोखंडी टामीने फिर्यादीच्या डाव्या हाताच्या तळहातावर जोरात मारले, ज्यामुळे त्यांना गंभीर जखम होऊन सात टाके पडले आहेत. रावेत पोलीस तपास करत आहेत.
