लखनऊ : भारतीय जनता पक्षाचे (भाजप) राष्ट्रीय अध्यक्ष नितीन नवीन शनिवारी दोन दिवसांच्या उत्तर प्रदेश दौऱ्यावर लखनऊ येथे दाखल झाले. राष्ट्रीय अध्यक्षपदाची जबाबदारी स्वीकारल्यानंतर त्यांचा हा उत्तर प्रदेशातील पहिलाच दौरा असून, आगामी 2027 विधानसभा निवडणुकांच्या पार्श्वभूमीवर या दौऱ्याकडे विशेष महत्त्वाने पाहिले जात आहे.
भाजपने या दौऱ्याला ‘मिशन-2027’चा प्रारंभ मानले असून, आगामी निवडणुकांसाठी पक्षाची संघटनात्मक रणनीती, बूथस्तरावरील तयारी आणि कार्यकर्त्यांच्या समन्वयावर सविस्तर चर्चा होण्याची शक्यता आहे.
दौऱ्यादरम्यान नितीन नवीन हे मुख्यमंत्री योगी आदित्यनाथ, प्रदेशातील वरिष्ठ नेते, पदाधिकारी आणि संघटनात्मक जबाबदाऱ्यांवर कार्यरत असलेल्या कार्यकर्त्यांशी बैठक घेणार असल्याची माहिती आहे. या बैठकीत निवडणुकीसाठी पक्षाची पुढील दिशा, संघटन बळकटीकरण आणि जनसंपर्क मोहिमेचा आढावा घेतला जाणार आहे.
उत्तर प्रदेश हे देशातील सर्वात मोठे राजकीय राज्य मानले जाते. त्यामुळे 2027 विधानसभा निवडणुकीच्या अनुषंगाने भाजपने आतापासूनच तयारीला सुरुवात केली असून, राष्ट्रीय अध्यक्षांचा हा दौरा पक्षासाठी महत्त्वाचा मानला जात आहे.
या दौऱ्यात पक्षाच्या आगामी कार्यक्रमांची रूपरेषा, निवडणूक नियोजन आणि विविध राजकीय घडामोडींवरही चर्चा होण्याची शक्यता वर्तवली जात आहे.
