मुंबई, प्रतिनिधी : बृहन्मुंबई महानगरपालिकेच्या वतीने मुंबईतील नोंदणीकृत नगरपथविक्रेत्यांना (फेरीवाल्यांना) क्यूआर कोड आधारित ओळखपत्रांचे वितरण करण्याचा उपक्रम गुरुवारी महानगरपालिका मुख्यालयातील स्थायी समिती सभागृहात शुभारंभ करण्यात आला. या उपक्रमामुळे फेरीवाल्यांना अधिकृत ओळख मिळण्यासह व्यवस्थापन प्रक्रियेत पारदर्शकता आणि सुलभता वाढणार आहे.
कार्यक्रमाला सभागृह नेते गणेश खणकर, स्थायी समिती अध्यक्ष प्रभाकर शिंदे, शिवसेना गटनेते अमेय घोले, काँग्रेस गटनेते अशरफ आझमी, मनसे गटनेते यशवंत किल्लेदार, सुधार समिती अध्यक्षा संध्या दोशी, शिक्षण समिती अध्यक्षा राजेश्री शिरवडकर यांच्यासह विविध पक्षांचे नगरसेवक, नगरसेविका आणि महापालिकेचे वरिष्ठ अधिकारी उपस्थित होते.
या उपक्रमांतर्गत वितरित करण्यात येणाऱ्या ओळखपत्रांमध्ये क्यूआर कोड तंत्रज्ञानाचा वापर करण्यात आला असून, त्यामध्ये संबंधित फेरीवाल्यांची अधिकृत माहिती उपलब्ध राहणार आहे. यामुळे नोंदणीकृत फेरीवाल्यांची ओळख पडताळणे, माहिती अद्ययावत ठेवणे आणि प्रशासनिक कामकाज अधिक प्रभावीपणे राबविणे शक्य होणार आहे.
मुंबईच्या अर्थव्यवस्थेत फेरीवाल्यांचे महत्त्वपूर्ण योगदान असून, त्यांना अधिकृत ओळख आणि संरक्षण देण्यासाठी महानगरपालिका विविध उपाययोजना राबवत आहे. क्यूआर कोड आधारित ओळखपत्रांमुळे फेरीवाल्यांना त्यांच्या व्यवसायासाठी आवश्यक असलेली वैध ओळख मिळेल तसेच डिजिटल व्यवस्थापनाला चालना मिळेल, असे यावेळी नमूद करण्यात आले.
महापालिकेच्या या उपक्रमामुळे फेरीवाला व्यवस्थापन अधिक पारदर्शक, तंत्रज्ञानाधारित आणि नागरिकाभिमुख होण्यास मदत होणार असल्याचे मत उपस्थित मान्यवरांनी व्यक्त केले.
