पिंपरी :
मतदार यादी अधिक अचूक आणि अद्ययावत करण्यासाठी सुरू असलेल्या विशेष सखोल पुनरीक्षण मोहिमेला भारत निवडणूक आयोगाने मुदतवाढ दिली आहे. राज्यातील अतिवृष्टीची परिस्थिती लक्षात घेऊन हा निर्णय घेण्यात आला असून, आता मतदान केंद्रस्तरीय अधिकारी (बीएलओ) ८ ऑगस्ट २०२६ पर्यंत नागरिकांच्या घरभेटी घेऊन गणना प्रपत्र संकलित करणार आहेत.
सुधारित वेळापत्रकानुसार ८ ऑगस्टपर्यंत मतदान केंद्रांचे सुसूत्रीकरण आणि पुनर्रचनेचे कामही पूर्ण केले जाणार आहे. त्यानंतर १७ ऑगस्ट रोजी प्रारूप मतदार यादी प्रसिद्ध होईल. १७ ऑगस्ट ते १६ सप्टेंबर या कालावधीत दावे व हरकती स्वीकारल्या जाणार असून, त्यावरील सुनावणी व निपटारा करून १९ ऑक्टोबर रोजी अंतिम मतदार यादी जाहीर केली जाणार आहे.
पिंपरी-चिंचवड महापालिका क्षेत्रातील पात्र मतदारांनी बीएलओंना आवश्यक कागदपत्रांसह गणना प्रपत्र भरून द्यावे किंवा संबंधित मतदान केंद्रावर जाऊन ते सादर करावे, असे आवाहन प्रशासनाने केले आहे.
महापालिका आयुक्त डॉ. विजय सूर्यवंशी म्हणाले, “मतदार यादी हा लोकशाहीचा पाया आहे. प्रत्येक पात्र नागरिकाचे नाव अचूकपणे नोंदविले जाणे आवश्यक आहे. मुदतवाढीचा लाभ घेत नागरिकांनी या मोहिमेत सक्रिय सहभाग नोंदवावा.”
अतिरिक्त आयुक्त विक्रांत बगाडे यांनीही नागरिकांनी शेवटच्या दिवसाची वाट न पाहता गणना प्रपत्र तातडीने भरून देण्याचे आवाहन केले आहे.
सुधारित वेळापत्रक
८ ऑगस्टपर्यंत – बीएलओंच्या घरभेटी व गणना प्रपत्र संकलन
८ ऑगस्ट – मतदान केंद्रांचे सुसूत्रीकरण पूर्ण
१७ ऑगस्ट – प्रारूप मतदार यादी प्रसिद्ध
१७ ऑगस्ट ते १६ सप्टेंबर – दावे व हरकती स्वीकारणे
१९ ऑक्टोबर – अंतिम मतदार यादी प्रसिद्ध
