पिंपरी, दि. ६ (प्रतिनिधी) – शासनाने प्रतिबंधित केलेली सुगंधी तंबाखू आणि गुटखा अवैधरित्या विकणाऱ्या एका आरोपीला पोलिसांनी रंगेहात अटक केली आहे. ही कारवाई ४ जून रोजी रात्री ९:३३ वाजता कुदळवाडीतील विसावा चौका शेजारील रॉयल फॉर्म वॉशिंग सेंटरजवळ करण्यात आली.
दिलीप उर्फ ओम प्रकाश राजाराम मोदनवाल (वय २६, रा. कुदळवाडी, चिखली) याला अटक केली आहे. अंमली पदार्थ विरोधी पथक, गुन्हे शाखेतील पोलीस शिपाई संतोष बिभीषण सपकाळ यांनी शुक्रवारी (दि. ५ जून) रोजी चिखली पोलीस ठाण्यात फिर्याद दिली आहे. पोलिसांनी दिलेल्या माहितीनुसार, गुटखा सेवनाने कर्करोग होतो हे माहित असतानाही आरोपी शासनाच्या बंदी आदेशाचे उल्लंघन करून ३६ हजार ५८८ रुपये किमतीचा वेगवेगळ्या कंपन्यांचा गुटखा, सुगंधी तंबाखू व पानमसाला स्वतःच्या फायद्यासाठी विकताना मिळून आला. त्याच्याकडून मुद्देमाल व मोबाइल जप्त केला आहे. या गुन्ह्याचा पुढील तपास चिखली पोलीस ठाण्यातील उपनिरीक्षक शिळीमकर करत आहेत.
