पिंपरी, दि. १४ (प्रतिनिधी) – एका बंद घराचे बेडरूमचे लॉक बनावट चावीने उघडून दिवाणमधील ट्रॅव्हलिंग बॅगेत ठेवलेले ११ लाख २८ हजार रुपये किमतीचे सोन्याचे दागिने एका चोरट्याने पळवले. ही घटना ४ मे ते १२ मे दरम्यान लक्ष्मणनगर थेरगाव येथे घडली.
या प्रकरणी एका महिलेने बुधवारी (दि. १३ मे) रोजी वाकड पोलीस ठाण्यात फिर्याद दिली आहे. त्यानुसार योगेश लहु जाधव (वय २६, लक्ष्मणनगर, थेरगाव पुणे; मूळ गाव – घोरवाडी, हुमनाबाद, बिदर) याला पोलिसांनी अटक केली आहे. पोलिसांनी दिलेल्या माहितीनुसार, फिर्यादी महिला बाहेर गेलेली असताना चोराने बनावट चावीच्या साहाय्याने बेडरूमचे कुलूप उघडले. बेडरूममधील दिवाणमध्ये ठेवलेल्या ट्रॅव्हलिंग बॅगेतून चोराने एकूण १४ तोळे १ ग्रॅम वजनाचे सोन्याचे दागिने, ज्यांची किंमत ११ लाख २८ हजार रुपये आहे, ते चोरून नेले. पोलिसांनी या प्रकरणी आरोपीला अटक केली असून वाकड पोलीस पुढील तपास करत आहेत.
थेरगाव येथे बनावट चावीने घरफोडी; ११ लाखांचे सोने लंपास; एकास अटक
