तेहरान : प्रतिनिधी : मध्यपूर्वेतील संघर्ष अधिक तीव्र झाला असून, अमेरिकेच्या हवाई कारवायांनंतर इराणने कुवैतमधील अमेरिकी लष्करी तळांवर क्षेपणास्त्र हल्ले केल्याचा दावा केला आहे. इराणचे राष्ट्राध्यक्ष मसूद पेजेशकियन यांनी दोन्ही देशांतील संघर्ष आता “पूर्ण स्वरूपाच्या युद्धात” बदलल्याचे म्हटले आहे.
इराणच्या सरकारी वृत्तसंस्था आयआरएनएने लष्कराच्या हवाल्याने दिलेल्या माहितीनुसार, कुवैतमधील कॅम्प आरिफजान येथे तैनात असलेल्या अमेरिकी सैन्याच्या HIMARS क्षेपणास्त्र प्रणालींना लक्ष्य करण्यात आले. या कारवाईत अमेरिकी क्षेपणास्त्र क्षमतेला फटका बसल्याचा दावा इराणने केला आहे. या दाव्याची स्वतंत्र पुष्टी अद्याप झालेली नाही.
कॅम्प आरिफजान हा कुवैतमधील अमेरिकेचा महत्त्वाचा लष्करी तळ असून, येथे अमेरिकी स्थलसेना, हवाई दल, नौदल, मरीन कॉर्प्स आणि तटरक्षक दलाचे तळ आहेत. हल्ल्यानंतर कुवैतमध्ये हवाई सतर्कता वाढविण्यात आली असून, सुरक्षा यंत्रणा अलर्टवर आहेत.
राष्ट्राध्यक्ष मसूद पेजेशकियन यांनी देशाला संबोधित करताना, “इराण आता पूर्ण क्षमतेने युद्धात सहभागी झाला आहे. या संघर्षाच्या परिणामांना सामोरे जाण्यासाठी देशाने सज्ज राहिले पाहिजे,” असे म्हटले. दरम्यान, अमेरिका या कारवायांकडे प्रादेशिक सुरक्षेसाठी गंभीर धोका म्हणून पाहत असून, मध्यपूर्वेतील तणाव आणखी वाढण्याची भीती व्यक्त केली जात आहे.
