अवैध दारूविरोधात तिन्ही यंत्रणांचा संयुक्त एल्गार; पुणे-पिंपरी परिसरात मोठ्या कारवाईची तयारी
पिंपरी-चिंचवड, पुणे शहर आणि ग्रामीण पोलीस एकाच व्यासपीठावर; हातभट्ट्या, भेसळयुक्त दारू आणि तस्करी रोखण्यासाठी समन्वित मोहीम
पिंपरी–चिंचवड :
फुगेवाडी विषारी दारूकांडाच्या पार्श्वभूमीवर अवैध दारू व्यवसायाविरोधात आता व्यापक आणि समन्वित मोहीम उभारण्यात आली आहे. पिंपरी-चिंचवड, पुणे शहर आणि पुणे ग्रामीण परिसरातील अवैध दारूच्या संपूर्ण साखळीवर एकाचवेळी कारवाई करण्यासाठी पोलीस, राज्य उत्पादन शुल्क विभाग आणि अन्न व औषध प्रशासन यांनी संयुक्त रणनीती आखली आहे. यासाठी पिंपरी-चिंचवड पोलीस आयुक्तालयात उच्चस्तरीय समन्वय बैठक पार पडली.
पोलीस आयुक्त विनय कुमार चौबे यांच्या मार्गदर्शनाखाली शुक्रवारी (५ जून) आयोजित बैठकीत अवैध दारू निर्मिती, वाहतूक, साठवण आणि विक्री रोखण्यासाठी ठोस उपाययोजनांवर चर्चा करण्यात आली. विशेषतः सीमाभागातून होणारी दारूची तस्करी, हातभट्ट्यांचे जाळे आणि भेसळयुक्त मद्यनिर्मितीवर संयुक्त कारवाई करण्यावर भर देण्यात आला.
बैठकीला पोलीस सह आयुक्त डॉ. शशिकांत महावरकर, अपर पोलीस आयुक्त सारंग आवाड व बसवराज तेली, पुणे ग्रामीणचे पोलीस अधीक्षक संदीप सिंह गिल, राज्य उत्पादन शुल्क विभागाचे अधीक्षक अतुल कानडे, अन्न व औषध प्रशासनाचे सह आयुक्त गिरीष हुकरे, पुणे शहर पोलीस उप आयुक्त चिलूमुल्ला रजनीकांत तसेच पिंपरी-चिंचवडचे पोलीस उप आयुक्त (गुन्हे) रोहिदास पवार यांच्यासह विविध विभागांचे वरिष्ठ अधिकारी उपस्थित होते.
बैठकीत अवैध दारूच्या प्रत्येक टप्प्यावर लक्ष ठेवण्याचा निर्णय घेण्यात आला. हातभट्ट्यांपासून ते अंतिम विक्रेत्यांपर्यंत संपूर्ण नेटवर्कचा शोध घेण्यासाठी विभागांमध्ये गुप्त माहितीची देवाणघेवाण अधिक प्रभावी करण्याचे ठरले. संशयास्पद हालचाली, अवैध साठे आणि तस्करीच्या मार्गांबाबत तात्काळ माहितीची देवाणघेवाण करून कारवाई केली जाणार आहे.
येत्या काळात पोलीस, उत्पादन शुल्क विभाग आणि अन्न व औषध प्रशासन यांच्या संयुक्त पथकांकडून विविध भागांत धडक मोहिमा राबविण्यात येणार आहेत. विशेषतः पिंपरी-चिंचवड, पुणे शहर आणि ग्रामीण भागांच्या सीमांवरील संवेदनशील ठिकाणे रडारवर ठेवली जाणार आहेत.
फुगेवाडीतील दुर्दैवी घटनेनंतर प्रशासनाने अवैध दारूविरोधात ‘शून्य सहनशीलता’ धोरण स्वीकारल्याचे या बैठकीतून स्पष्ट झाले. त्यामुळे हातभट्टी चालक, भेसळयुक्त दारू तयार करणारे, तस्कर आणि अवैध विक्रेते यांच्याविरोधातील कारवाया अधिक तीव्र होण्याचे संकेत मिळाले आहेत. अवैध दारूच्या संपूर्ण साखळीवर एकत्रितपणे घाव घालण्यासाठी उभारलेली ही मोहीम आगामी काळात निर्णायक ठरणार असल्याचे मानले जात आहे.
