उन्हाच्या तडाख्यात हंगामी फळांना पसंती; महागड्या ज्यूसला पर्याय म्हणून फळांचे सेवन वाढले
पिंपरी-चिंचवड –
शहरात उन्हाचा कडाका दिवसेंदिवस वाढत असताना पिंपरी-चिंचवडमधील फळबाजारांमध्ये हंगामी फळांची मागणी मोठ्या प्रमाणात वाढली आहे. विशेषतः कोकणातून येणाऱ्या फणस, करवंदे आणि जांभळांनी बाजारपेठ गजबजून गेली आहे. उष्णतेपासून बचाव आणि आरोग्याची काळजी यामुळे नागरिक ताज्या फळांकडे वळत असल्याचे चित्र दिसत आहे.
चिंचवड, पिंपरी, भोसरी आणि परिसरातील बाजारपेठांमध्ये सध्या ‘कोकणी मेवा’ ग्राहकांना आकर्षित करत आहे. फणसाचे गरे, करवंदे आणि जांभळे खरेदी करण्यासाठी नागरिकांची गर्दी होत आहे. फळविक्रेत्यांच्या मते, गेल्या काही दिवसांत या फळांच्या विक्रीत लक्षणीय वाढ झाली आहे.
सध्या बाजारात फणसाचे गरे प्रतिकिलो २४० रुपयांनी विकले जात आहेत. जांभूळ ६० ते १०० रुपये पावशेर दराने उपलब्ध आहे. तर करवंदे १५ ते २० रुपये छोटा ग्लास या दराने विक्रीस आहेत. उन्हाळ्यात शरीराला थंडावा देणारी आणि पौष्टिक मानली जाणारी ही फळे ग्राहकांच्या पसंतीस उतरली आहेत.
उन्हाळ्यात शरीरातील पाण्याचे प्रमाण कमी होते. त्यामुळे पाण्याने समृद्ध असलेल्या फळांची मागणी वाढते. आंबा, कलिंगड, खरबूज, द्राक्षे यांसारखी फळे बाजारात मुबलक प्रमाणात उपलब्ध आहेत. या फळांमधील जीवनसत्त्वे, खनिजे आणि नैसर्गिक साखर शरीराला ऊर्जा देण्यास मदत करतात. त्यामुळे नागरिक फळांच्या सेवनावर भर देत आहेत.
दरम्यान, आंब्याच्या आवकेत वाढ झाल्याने त्याचे दरही काहीसे कमी झाले आहेत. बाजारात विविध जातींचे आंबे उपलब्ध असून हापूस आंब्याला सर्वाधिक मागणी आहे. अनेक ठिकाणी आंबा १०० ते १६० रुपये किलोच्या आसपास विकला जात आहे. याशिवाय ड्रॅगन फ्रूट, लिची, पेर आणि आलुबुखार यांनाही ग्राहकांकडून चांगला प्रतिसाद मिळत आहे.
दुसरीकडे, फळांच्या रसाचे दर वाढल्याने अनेकांनी ज्यूसऐवजी थेट फळे खाण्याला प्राधान्य दिले आहे. संत्री-मोसंबी ज्यूससाठी ५५ रुपये, अननस ज्यूससाठी ५० ते ५५ रुपये, टरबूज ज्यूससाठी ४० रुपये, मँगो ज्यूससाठी ६० रुपये, मिक्स फ्रूट ज्यूससाठी ५० रुपये, तर डाळिंब ज्यूससाठी तब्बल ९० रुपये मोजावे लागत आहेत. त्यामुळे अनेक नागरिक लिंबूपाणी किंवा ताजी फळे यांचा पर्याय स्वीकारत आहेत.
फळविक्रेत्यांच्या म्हणण्यानुसार, उष्णतेचा प्रभाव वाढताच फळांची विक्री आणखी वाढण्याची शक्यता आहे. आरोग्याबाबत वाढती जागरूकता आणि कडक उन्हाळा यामुळे सध्या पिंपरी-चिंचवडमधील फळबाजार ग्राहकांनी फुलून गेले आहेत. ताज्या फळांना मिळणारा प्रतिसाद पाहता आगामी काही दिवस ‘कोकणी मेवा’ची बाजारातील चलती कायम राहणार असल्याचे चित्र आहे.
