मुंबई : मान्सूनला झालेला विलंब आणि अपेक्षेपेक्षा कमी झालेल्या पावसामुळे मुंबईवर गंभीर पाणीटंचाईचे संकट ओढवण्याची शक्यता निर्माण झाली आहे. मुंबईला पाणीपुरवठा करणाऱ्या सात धरणांतील एकूण उपयुक्त पाणीसाठा ७ टक्क्यांपेक्षाही खाली घसरला असून, ही स्थिती गेल्या वर्षीच्या तुलनेत अत्यंत चिंताजनक आहे.
बृहन्मुंबई महानगरपालिकेच्या जल अभियंता विभागाच्या माहितीनुसार, सोमवारी सकाळी ६ वाजेपर्यंत सातही धरणांमध्ये १,००,२७९ दशलक्ष लिटर पाणी, म्हणजेच एकूण उपयुक्त साठ्याच्या केवळ ६.९३ टक्के पाणी शिल्लक होते. गेल्या वर्षी याच दिवशी हा साठा ५,७१,६७० दशलक्ष लिटर (३९.५ टक्के) इतका होता.
मुंबईला भातसा, अपर वैतरणा, मोडक सागर, तानसा, मिडल वैतरणा, तुळशी आणि विहार या सात धरणांतून दररोज सुमारे ४,००० दशलक्ष लिटर पिण्याच्या पाण्याचा पुरवठा केला जातो. या धरणांची एकूण उपयुक्त साठवण क्षमता १४.४७ लाख दशलक्ष लिटर आहे.
चार प्रमुख धरणे अपर वैतरणा, मोडक सागर, तानसा आणि मिडल वैतरणा यामध्ये मिळून ४६,१९२ दशलक्ष लिटर पाणी असून, तो त्यांच्या एकत्रित उपयुक्त क्षमतेच्या केवळ ६.६५ टक्के आहे.
धरणांपैकी विहार धरणात सर्वाधिक ४५.१३ टक्के, तुळशी धरणात २४.२६ टक्के, तर मोडक सागरात १८.४७ टक्के उपयुक्त पाणीसाठा उपलब्ध आहे.
दरम्यान, अपर वैतरणा धरणातील उपयुक्त पाणीसाठा शून्यावर आला असून, सध्या लोअर ड्रॉडाउन लेव्हल (LDL) खालील ११,९७४ दशलक्ष लिटर पाण्याचा वापर केला जात आहे.
गेल्या २४ तासांत तुळशी धरण परिसरात १७९ मिमी, विहारमध्ये ११२ मिमी, मोडक सागरात ३८ मिमी, तर भांडूप संकुलात १९१ मिमी पावसाची नोंद झाली आहे.
यापूर्वी १७ जून रोजी सातही धरणांतील पाणीसाठा १,४४,९१८ दशलक्ष लिटर (१०.०१ टक्के) होता. त्यानंतरही पुरेसा पाऊस न झाल्याने साठ्यात आणखी मोठी घट झाली आहे. त्यामुळे येत्या काही दिवसांत मुसळधार पाऊस न झाल्यास मुंबईसमोरील पाणीपुरवठ्याचे संकट अधिक गडद होण्याची शक्यता व्यक्त केली जात आहे.
