पिंपरी, दि. १६ (प्रतिनिधी) – पिंपरी-चिंचवड पोलिसांच्या अनैतिक मानवी वाहतूक प्रतिबंध कक्षाने चिखली परिसरात एका लॉजवर धडक कारवाई करत वेश्याव्यवसायाचा पर्दाफाश केला आहे. लक्ष्मी चौक येथील आदित्य लॉजवर टाकलेल्या छाप्यात पोलिसांनी नऊ पीडित महिलांची सुटका केली. यामध्ये बांगलादेशातून तस्करी करून आणलेल्या एका महिलेचाही समावेश आहे.
अनैतिक मानवी वाहतूक प्रतिबंध कक्ष आणि दहशतवाद विरोधी सेलने १३ एप्रिल रोजी रात्री ११ वाजताच्या सुमारास ही कारवाई केली. देहू-आळंदी रोडवरील आदित्य लॉजमध्ये लॉजच्या नावाखाली देहविक्रीचा व्यवसाय सुरू असल्याचे पोलिसांना माहिती मिळाली. त्यानुसार कारवाई करत लॉज मॅनेजर अशोक बाबुराव बाबर आणि कामगार अकिबुल खालेक मुल्ला, लॉज चालक सुदर्शन पवार, जागा मालक नाना बोराटे आणि मॅनेजर साहील ऊर्फ शाहीन शिराजुल मंडल यांना पोलिसांनी अटक केली आहे. या प्रकरणी चिखली पोलीस ठाण्यात भारतीय न्याय संहिता आणि पिटा कायद्यांतर्गत गुन्हा नोंदवण्यात आला आहे.
सुटका करण्यात आलेल्या ९ महिलांपैकी एका महिलेला आरोपींनी बांगलादेशातून तस्करी करून भारतात आणले होते. पोलिसांनी या पीडित महिलेची सुटका केली असून, तिला पुन्हा मायदेशी पाठवण्याची प्रक्रिया पोलीस प्रशासनाकडून सुरू करण्यात आली आहे.
पोलिसांकडून कारवाईचा धडका
अनैतिक मानवी वाहतूक प्रतिबंध कक्षाने सन २०२६ मध्ये आतापर्यंत एकूण ११ ठिकाणी छापे टाकले आहेत. यामध्ये ७ मसाज पार्लर/स्पा सेंटर आणि ४ हॉटेल्सचा समावेश आहे. या सर्व कारवायांमध्ये आतापर्यंत ३१ आरोपींना अटक करण्यात आली असून २८ पीडित महिलांची सुटका करण्यात आली आहे.
