पिंपरी | प्रतिनिधी:
पिंपरी-चिंचवड शहराचा वाढता विस्तार आणि लोकसंख्येचा विचार करता, महापालिका प्रशासनाने नागरिकांच्या सुविधेसाठी ऐतिहासिक पाऊल उचलले आहे. विद्यमान ८ प्रभाग समित्यांची पुनर्रचना करून आता १० नवीन क्षेत्रीय कार्यालयांची स्थापना करण्यात आली आहे. विशेष म्हणजे, या प्रत्येक कार्यालयाला महाराष्ट्राच्या वैभवाचे प्रतीक असलेल्या ऐतिहासिक किल्ल्यांची नावे देण्यात आली आहेत. आयुक्त डॉ. विजय सूर्यवंशी यांनी बुधवारी (१३ मे) या संदर्भात अधिकृत आदेश जारी केले.
प्रशासकीय कामाला येणार ‘गती’
शहराच्या कानाकोपऱ्यातील नागरिकांना नागरी सुविधांसाठी मुख्य कार्यालयाकडे धाव घ्यावी लागू नये आणि स्थानिक पातळीवर तक्रारींचे निवारण व्हावे, हा या पुनर्रचनेचा मुख्य हेतू आहे. महाराष्ट्र महानगरपालिका अधिनियमातील तरतुदींनुसार, १३ मार्च २०२६ च्या महापालिका सभेतील निर्णयाची आता अंमलबजावणी होत आहे. २५ मे २०२६ पासून ही नवीन रचना अधिकृतपणे अमलात येईल.
किल्ल्यांच्या नावाने ओळखली जाणारी नवीन क्षेत्रीय कार्यालये:
कार्यालय किल्ल्याचे नाव मुख्य ठिकाण / पत्ता समाविष्ट प्रभाग क्रमांक
अ राजगड संत ज्ञानेश्वर चौक, निगडी प्राधिकरण १३, १४, १५
ब सिंहगड लिंक रोड, चिंचवडगाव १७, १८, १९
क विजयदुर्ग नेहरूनगर, भोसरी (हॉकी स्टेडियम शेजारी) २, ९, १०
ड देवगिरी रहाटणी (औंध-रावेत रोड) २१, २७, २८, २९
ई शिवनेरी नाशिक रोड, भोसरी (पांजरपोळ समोर) ३, ४, ५
फ तोरणा टिळक चौक, निगडी (प्राधिकरणाची जुनी इमारत) १, ११, १२
ग पुरंदर थेरगाव (क्रिकेट अकॅडमी मागे) २२, २३, २४
ह प्रतापगड कासारवाडी (महिला आय.टी.आय इमारत) ३०, ३१, ३२
ज रायगड ताथवडे (मनपा वाहनतळ इमारत) १६, २५, २६
ल लोहगड पिंपरी (संत तुकाराम नगर, म्हाडा प्लॉट) ६, ७, ८, २०
ठळक वैशिष्ट्ये:
निवडणूक प्रभाग विभागणी: २०२५-२६ च्या सार्वत्रिक निवडणुकीनुसार एकूण ३२ निवडणूक प्रभागांची या १० कार्यालयांतर्गत विभागणी करण्यात आली आहे.
नागरिकाभिमुख सेवा: नवीन कार्यालयांमुळे कामाचा ताण विभागला जाऊन नागरिकांना दाखले, कर भरणा आणि इतर तक्रारींसाठी कमी अंतर कापवे लागेल.
ऐतिहासिक वारसा: कार्यालयांना किल्ल्यांची नावे देऊन प्रशासकीय कामात शिस्त आणि शिवकालीन वारशाचा आदर जपण्याचा प्रयत्न करण्यात आला आहे.
”शहराचा भौगोलिक विस्तार मोठा आहे. ही नवीन पुनर्रचना नागरिकांना अधिक सुलभ आणि तत्पर सेवा देण्यासाठी मैलाचा दगड ठरेल.”
— डॉ. विजय सूर्यवंशी (आयुक्त, पिंपरी चिंचवड महानगरपालिका)
