पिंपरी (दि. १६ मे):
चऱ्होली येथील बहुचर्चित गोळीबार प्रकरणातील मुख्य आरोपीने थेट पोलिसांनाच ‘ओपन चॅलेंज’ देत थरारक पलायन केल्याची घटना रांजणगाव परिसरातील पिंपरी दुमाला येथे घडली आहे. पोलिसांच्या गाडीची जोरदार धडक बसूनही, हवेत बेछूट गोळीबार करत हा सराईत गुन्हेगार उसाच्या दाट शेतात पसार झाला. या ‘फिल्मी स्टाईल’ थरारामुळे संपूर्ण परिसरात कमालीची घबराट पसरली आहे.
शेखर संभाजी जाधव (वय २५) असे पोलिसांच्या हातावर तुरी देऊन फरार झालेल्या सराईत आरोपीचे नाव आहे. त्याच्यावर दिघी पोलीस ठाण्यात आधीच गोळीबाराचा गंभीर गुन्हा दाखल आहे.
’असा’ रचला होता खाकीचा सापळा
चऱ्होली येथे करण राठोड यांच्यावर झालेल्या गोळीबारानंतर शेखर जाधव आणि त्याचा साथीदार भूमिगत झाले होते. गुन्हे शाखा (क्राईम ब्रांच) या प्रकरणाचा समांतर तपास करत होती. तांत्रिक विश्लेषण आणि गुप्तहेरांकडून मिळालेल्या पक्क्या माहितीच्या आधारे, शेखर जाधव हा रांजणगाव जवळील पिंपरी दुमाला गावात लपल्याचे पोलिसांना समजले. त्यानुसार शनिवारी सायंकाळी ६ च्या सुमारास पोलिसांनी या भागाला वेढा दिला आणि दबा धरून बसले.
थरारक पाठलाग आणि गोळीबार!
पोलिसांचा गराडा पडत असल्याचे लक्षात येताच, हुशार असलेल्या शेखरने दुचाकीवरून सुसाट पळ काढला. पोलिसांनीही क्षणाचाही विलंब न लावता स्वतःच्या कारमधून त्याचा थरारक पाठलाग सुरू केला. काही अंतरावर पोलिसांच्या गाडीने आरोपीच्या दुचाकीला जोरदार धडक दिली. धडक इतकी भीषण होती की आरोपी दुचाकीसह रस्त्यावर कोसळला.
मात्र, एवढ्या मोठ्या अपघातानंतरही न डगमगता शेखर ताडकन उठला. त्याने दुचाकी तिथेच टाकली आणि पायाला भिंगरी लावून पळू लागला. पाठलाग करणाऱ्या पोलिसांवर दबाव आणण्यासाठी त्याने कमरेचे पिस्तूल उपसले आणि थेट हवेत गोळीबार केला. ऐन सायंकाळी झालेल्या या गोळीबारामुळे परिसरात एकच खळबळ उडाली आणि नागरिक जीव मुठीत धरून पळाले.
अंधाराचा आणि उसाच्या शेताचा फायदा
गोळीबार करतच शेखरने रस्त्या कडेला असलेल्या उसाच्या दाट शेतात धाव घेतली. पोलीसही जीवाचे रान करत त्याच्या मागे शेतात घुसले. मात्र, उसाचे दाट पीक आणि हळूहळू वाढू लागलेला अंधार यांचा गैरफायदा घेत आरोपी पोलिसांच्या डोळ्यादेखत पसार होण्यात यशस्वी ठरला.
परिसरात हायअलर्ट; शोध मोहीम युद्धपातळीवर
या घटनेनंतर संपूर्ण रांजणगाव परिसराला छावणीचे स्वरूप आले आहे. पुणे ग्रामीण गुन्हे शाखा आणि पिंपरी-चिंचवड पोलिसांची अतिरिक्त पथके तात्काळ घटनास्थळी दाखल झाली आहेत. संपूर्ण परिसरात कडक नाकाबंदी करण्यात आली असून, उसाच्या शेतासह आजूबाजूच्या परिसरात आरोपीचा शोध घेण्यासाठी युद्धपातळीवर कोम्बिंग ऑपरेशन सुरू आहे. सराईत गुन्हेगाराने पोलिसांनाच दिलेल्या या थेट आव्हानामुळे पोलीस वर्तुळातूनही आता तीव्र पडसाद उमटत आहेत.
पोलिसांची गाडी धडकली, हवेत थरारक गोळीबार; उसाच्या शेतात घुसून ‘तो’ सराईत फरार! रांजणगाव परिसरात थरकाप; पोलिसांच्या सापळ्यातून सराईत गुन्हेगाराचे फिल्मी पलायन
