pimpri chinchwad-पिंपरी-चिंचवड परिसरात पोलिसांचा मोठा दणका वेगवेगळ्या छाप्यांमध्ये लाखो रुपयांची अवैध हातभट्टी दारू जप्त

​पिंपरी, दि. ३१ (pimpri chinchwad) – पिंपरी-चिंचवड पोलीस आयुक्तालयाच्या हद्दीत गुन्हे शाखा आणि स्थानिक पोलिसांनी वेगवेगळ्या ठिकाणी धडक कारवाई करत मानवी जिवाला धोकादायक असणारी अवैध हातभट्टी दारू आणि दारू बनवण्याचे रसायन जप्त केले आहे. या मोहिमेत देहुरोड, शिरगाव, हिंजवडी, पिंपरी, बावधन, चिंचवड, म्हाळुंगे आणि आळंदी परिसरात पोलिसांनी दारू माफियांवर गुन्हे दाखल केले आहेत. पोलिसांनी या कारवाईत मोठा मुद्देमाल हस्तगत केला आहे.
​देहुरोड (एम. बी. कॅम्प): गुन्हे शाखा युनिट-४ च्या पथकाने सात रुपये किमतीची ७० लीटर तयार हातभट्टी दारू जप्त करून आरोपी राजेश श्रीरंग कदम (वय ५३, रा. देहुरोड) याच्‍यावर गुन्‍हा दाखल केला.
​शिरगाव (पुसाणे): ओढ्याकाठी ५० हजार रुपये किमतीचे १००० लीटर दारू तयार करण्याचे गुळमिश्रित रसायन जप्त करण्यात आले. पोलिसांचा छापा पडताच आरोपी महिला स्नेहा वासुदेव नानावत (रा. पुसाणे) ही घटनास्थळावरून पळून गेली.
​हिंजवडी (मानरोड): एका पत्र्याच्या शेडमधून साडेपाच हजार रुपयांची तयार गावठी दारू जप्त करण्यात आली असून, आरोपी धनराज सोमाजी नट याच्यावर गुन्हा दाखल करण्यात आला आहे.
​पिंपरी (आंबेडकर चौक): खंडणी विरोधी पथकाने एक ऑटो रिक्षा (एमएच १४ सीयु ०३९३) पकडून त्यातून होणारी ८१ हजार ९५० रुपयांची अवैध दारू वाहतूक उघडकीस आणली. याप्रकरणी गामरबहादूर ढकळ (वय ४६) आणि संतोष रनवरे (वय ३०) या दोघांवर गुन्‍हा दाखल केला आहे.
​बावधन (कृष्णा कॉम्प्लेक्स): शुभांगी शंभू चौहान (वय ३६) या महिलेकडून १७ हजार ८०० रुपयांचा बेकायदेशीर प्रोव्हिबिशन माल जप्त करून कारवाई करण्यात आली.
​चिंचवड (गुरुद्वारा रोड): नंद डेअरीच्या पाठीमागे मोकळ्या जागेत १५ हजार रुपये किमतीची १५० लीटर तयार गावठी हातभट्टी दारू विकताना सायली अमर राठोड (वय २०) या तरुणीला पोलिसांनी पकडले.
​दक्षिण म्हाळुंगे (निघोजे व म्हाळुंगे): निघोजे येथील ओढ्याकाठी ७ हजार २०० रुपयांच्या दारूसह एका विधीसंघर्षित बालकाला ताब्यात घेण्यात आले. तर सिग्मा चौकात पाच हजार रुपयांची ५० लीटर दारू सोडून आरोपी दुरेश रमेश राठोड (वय ३३) हा पोलिसांना पाहून पळून गेला.
​पिंपरी (भाटनगर इमारती): बिल्डिंग नं. ६ मध्ये पोलिसांनी दोन वेगवेगळ्या खोल्यांवर छापे टाकले. तिसऱ्या मजल्यावरून तुलसी मनोज रावळकर (वय ५०) हिच्या खोलीतून ८ हजार ८०० रुपयांचे कच्चे रसायन, तर चौथ्या मजल्यावरून वर्षा सुरेश भाट (वय ४०) हिच्या खोलीतून पाच हजार २०० रुपयांचे रसायन व गॅस सिलेंडर, बर्नर जप्त करण्यात आले.
​आळंदी (चऱ्होली खुर्द): ज्ञानसागर मंगल कार्यालयाच्या पाठीमागे पाच हजार २५० रुपये किमतीची १०५ लीटर तयार हातभट्टी दारू बाळगल्याप्रकरणी निर्मला संभा राजपूत (वय ५८) या महिलेवर गुन्हा दाखल करण्यात आला.
​या सर्व प्रकरणांमध्ये संबंधित पोलीस ठाण्यांचे पोलीस उपनिरीक्षक आणि अंमलदार पुढील तपास करीत आहेत.