भाडेकरूंची माहिती पोलीस ठाण्यात देणे आता बंधनकारक; आदेशाचे उल्लंघन केल्यास कारवाई पुणे ग्रामीण जिल्ह्यासाठी अपर जिल्हादंडाधिकाऱ्यांचे निर्देश; घरमालकांनी आवश्यक कागदपत्रे सादर करण्याचे आवाहन
पुणे, दि. २९ (प्रतिनिधी) : पुणे ग्रामीण जिल्ह्यातील घरमालकांसाठी महत्त्वाचा आदेश जारी करण्यात आला आहे. घर किंवा सदनिका भाड्याने देताना संबंधित भाडेकरूची संपूर्ण माहिती आता स्थानिक पोलीस ठाण्यात सादर करणे बंधनकारक करण्यात आले आहे. या आदेशाचे पालन न करणाऱ्या घरमालकांवर कायद्यानुसार दंडात्मक कारवाई केली जाणार आहे.
भारतीय नागरिक सुरक्षा संहिता-२०२३ मधील कलम १६३ अंतर्गत प्रदान करण्यात आलेल्या अधिकाराचा वापर करून अपर जिल्हादंडाधिकारी ज्योती कदम यांनी हा आदेश जारी केला आहे. जिल्ह्यातील कायदा व सुव्यवस्था अधिक सक्षम ठेवणे आणि संशयित हालचालींवर नियंत्रण ठेवणे हा या निर्णयामागील उद्देश असल्याचे प्रशासनाने स्पष्ट केले आहे.
आदेशानुसार, घरमालकांनी भाडेकरूची माहिती संबंधित स्थानिक पोलीस ठाण्यात लेखी स्वरूपात सादर करावी. यामध्ये भाडेकरूचे संपूर्ण नाव, सध्याचा पत्ता, मूळ गावाचा पत्ता, दोन अलीकडील छायाचित्रे, ओळख करून देणाऱ्या व्यक्तीचे नाव व पत्ता, घरभाडे करारनामा तसेच आधार कार्ड, मतदान ओळखपत्र किंवा अन्य वैध ओळखपत्राची प्रत जोडणे आवश्यक आहे.
प्रशासनाने स्पष्ट केले आहे की, भाडेकरूंची माहिती न देणे किंवा आदेशाचे उल्लंघन करणे हे गंभीर स्वरूपाचे मानले जाईल. अशा प्रकरणांमध्ये भारतीय न्याय संहितेच्या कलम २२३ अन्वये संबंधित घरमालकांवर दंडनीय कारवाई करण्यात येऊ शकते.
- या आदेशाची प्रभावी अंमलबजावणी करण्यासाठी स्थानिक पोलीस ठाण्यांना आवश्यक ती कार्यवाही करण्याचे निर्देश देण्यात आले आहेत. त्यामुळे पुणे ग्रामीण जिल्ह्यातील सर्व घरमालकांनी भाडेकरू ठेवण्यापूर्वी आवश्यक कागदपत्रांची पूर्तता करून माहिती वेळेत पोलीस ठाण्यात जमा करावी, असे आवाहन प्रशासनाने केले आहे.
