Beed-पुरुषोत्तमपुरी देवस्थानात डुप्लिकेट चांदीचा धक्कादायक प्रकार; सव्वाकिलो बनावट चांदी अर्पण
बीड :
बीड जिल्ह्यातील पुरुषोत्तमपुरी येथे अधिक मासानिमित्त भरलेल्या यात्रोत्सवात एक धक्कादायक प्रकार समोर आला आहे. महिनाभर चाललेल्या यात्रेत तब्बल ५० लाख भाविकांनी भगवान पुरुषोत्तमाचे दर्शन घेतले. या काळात देवस्थानला १ कोटी ४७ लाख रुपयांचे रोख दान, ९ ग्रॅम सोने आणि ४४६ ग्रॅम चांदी अर्पण करण्यात आली.
मात्र, दान स्वरूपात अर्पण करण्यात आलेल्या चांदीच्या मूर्ती आणि धोंड्यांची तपासणी करताना जवळपास सव्वाकिलो चांदी पूर्णपणे बनावट डुप्लिकेट असल्याचे उघड झाले आहे. या प्रकारामुळे देवस्थान प्रशासनासह भाविकांमध्येही खळबळ उडाली आहे.
तीन वर्षांपूर्वीच्या तुलनेत यंदा भाविकांची संख्या आणि देणग्यांमध्ये मोठी वाढ झाली असली, तरी श्रद्धेच्या नावाखाली बनावट चांदी अर्पण झाल्याची घटना चिंताजनक मानली जात आहे. देवस्थान प्रशासनाने या प्रकरणाची गंभीर दखल घेतली असून बनावट चांदी नेमकी कुठून आली आणि भाविकांची फसवणूक झाली का, याचा तपास सुरू करण्यात आला आहे.
श्रद्धा आणि विश्वासाच्या भावनेशी संबंधित अशा प्रकारामुळे धार्मिक स्थळांवर विक्री होणाऱ्या चांदीच्या वस्तूंच्या गुणवत्तेवरही प्रश्नचिन्ह निर्माण झाले आहे.
