Delhi-ग्लासगो राष्ट्रकुल क्रीडा स्पर्धेचे दिमाखदार उद्घाटन; मिराबाई चानू आणि लव्हलिना बोर्गोहेन यांच्या नेतृत्वाखाली भारतीय पथकाचा शानदार प्रवेश
नवी दिल्ली: स्कॉटलंडमधील ग्लासगो येथे 23 व्या राष्ट्रकुल क्रीडा स्पर्धेचे (Commonwealth Games 2026) रंगतदार आणि दिमाखदार उद्घाटन पार पडले. स्कॉटिश संस्कृती, संगीत आणि शाश्वत विकासाचा संदेश देणाऱ्या या भव्य सोहळ्यात ब्रिटनचे राजा चार्ल्स तिसरे यांनी स्पर्धांचे अधिकृत उद्घाटन केले.
उद्घाटनावेळी राजा चार्ल्स यांनी किंग्ज बॅटनमधील संदेश वाचून दाखवत समुद्र आणि जलस्रोतांतील प्लास्टिक प्रदूषण रोखण्यासाठी सर्व राष्ट्रांनी एकत्रित प्रयत्न करण्याचे आवाहन केले. पर्यावरण संवर्धन आणि शाश्वत भविष्यासाठी राष्ट्रकुल देशांची भूमिका महत्त्वाची असल्याचे त्यांनी यावेळी नमूद केले.
राष्ट्रकुल स्पर्धांच्या इतिहासात प्रथमच उद्घाटन सोहळा खुल्या मैदानाऐवजी 14,300 प्रेक्षक क्षमतेच्या OVO Hydro या इनडोअर स्टेडियममध्ये आयोजित करण्यात आला. आणखी एक वैशिष्ट्य म्हणजे 74 राष्ट्रांच्या खेळाडूंची संचलन फेरी उद्घाटन सोहळ्याच्या सुरुवातीलाच पार पडली.
भारतीय पथकाचे नेतृत्व ऑलिम्पिक पदक विजेत्या मिराबाई चानू आणि लव्हलिना बोर्गोहेन यांनी केले. पुरुष खेळाडू निळ्या रंगाच्या सूटमध्ये, तर महिला खेळाडू साडी आणि ब्लेझरमध्ये मैदानात दाखल होताच उपस्थित प्रेक्षकांनी टाळ्यांच्या कडकडाटात त्यांचे स्वागत केले.
स्कॉटिश पारंपरिक वारशासोबत आधुनिक पॉप, रॅप आणि इलेक्ट्रॉनिक संगीताचा सुरेख संगम घडवणारा उद्घाटन सोहळा प्रेक्षकांसाठी विशेष आकर्षण ठरला. राष्ट्रकुल क्रीडा स्पर्धांच्या नव्या पर्वाची सुरुवात भव्य सांस्कृतिक सादरीकरण आणि जागतिक ऐक्याच्या संदेशाने झाली.
