(pimpri chinchwad)-पिंपरी-चिंचवडमध्ये पोलीस सतर्क; सीसीटीव्ही, सुरक्षा रक्षक आणि शेजाऱ्यांच्या मदतीवर भर.
पिंपरी-चिंचवड ः उन्हाळी सुट्ट्यांमुळे मोठ्या प्रमाणात नागरिक कुटुंबासह बाहेरगावी जात आहेत. याच काळात बंद घरांवर चोरट्यांची नजर असल्याचे नुकत्याच रावेतमध्ये झालेल्या घरफोडीच्या घटनेवरून दिसून आले. अवघ्या पावणे दोन तासांत चोरट्यांनी बंद घरात घरफोडी करून १५ लाखांचा ऐवज लंपास केला. पिंपरी-चिंचवड शहर पोलिसांनी नागरिकांना सतर्कतेचा इशारा दिला आहे. सोसायट्यांमध्ये सीसीटीव्ही कार्यान्वित ठेवणे, सुरक्षा रक्षक नेमणे आणि बाहेरगावी जाताना शेजारी व स्थानिक पोलिसांना माहिती देणे आवश्यक असल्याचे आवाहन करण्यात आले आहे.
शहरात रोजीरोटीसाठी आलेले नागरिक मुलांना सुट्टी लागल्याने एप्रिल आणि मे महिन्यात आपल्या मूळ गावी जातात. तर काही कुटुंब थंड हवेच्या ठिकाणी फिरायला जातात. त्यामुळे या कालावधीत घरफोडीच्या घटनांमध्ये वाढ होत असल्याचे पोलिसांच्या निदर्शनास आले आहे. बंद असलेल्या घरांचा चोरट्यांकडून फायदा घेतला जातो. त्यामुळे “दक्ष नागरिक, सुरक्षित परिसर” आणि “आपला शेजारी खरा पहारेकरी” अभियान अधिक प्रभावीपणे राबवण्याच्या सूचना वरिष्ठ पोलीस अधिकाऱ्यांनी दिल्या आहेत.
पोलिसांकडून विविध गृहनिर्माण संस्था, सोसायट्या आणि रो-हाऊस परिसरात बैठका घेत नागरिकांना जागरूक केले जात आहे. बाहेरगावी जाणाऱ्या नागरिकांनी आपल्या जाण्या-येण्याची माहिती शेजाऱ्यांना तसेच स्थानिक पोलीस ठाण्याला द्यावी, असे आवाहन करण्यात आले आहे. त्यामुळे संबंधित परिसरात गस्त वाढविणे सोपे होणार आहे.
पोलिसांनी नागरिकांना घरात रोख रक्कम, सोन्याचे दागिने किंवा मौल्यवान वस्तू न ठेवण्याचा सल्ला दिला आहे. शक्य असल्यास किमती ऐवज बँकेच्या लॉकरमध्ये ठेवावेत, असे सांगण्यात आले आहे. तसेच सोसायटी परिसरातील सीसीटीव्ही कॅमेरे सुरू स्थितीत आहेत का याची तपासणी करावी. खराब कॅमेरे तातडीने दुरुस्त करावेत. ज्या ठिकाणी कॅमेरे नाहीत, तेथे नवीन कॅमेरे बसवण्यावर भर द्यावा, असेही सांगण्यात आले आहे.
उन्हाळी सुट्टीच्या पार्श्वभूमीवर शहरातील संवेदनशील परिसर, फार्महाऊस आणि कमी वर्दळीच्या भागात पोलीस गस्त वाढवण्यात येणार आहे. रात्रीच्या वेळी पायी पेट्रोलिंग वाढवण्याच्या सूचनाही देण्यात आल्या आहेत. सुरक्षा रक्षकांना स्थानिक पोलिसांचे संपर्क क्रमांक देण्यात येणार आहेत.
रेकॉर्डवरील गुन्हेगारांवर विशेष लक्ष ठेवण्याचे आदेश देण्यात आले आहेत. संशयितांची चौकशी, अचानक नाकाबंदी आणि संवेदनशील भागात विशेष तपासणी मोहीम राबवली जाणार आहे. मोकळ्या जागा, अंधारे रस्ते आणि आडबाजूच्या परिसरातही गस्त वाढवण्यात येणार असल्याची माहिती पोलीसांकडून देण्यात आली.
घरफोड्या टाळण्यासाठी घ्या ही काळजी
– शेजाऱ्यांना प्रवासाची माहिती द्या
– घरात रोख रक्कम ठेवू नका
– दागिने बँक लॉकरमध्ये ठेवा
– सीसीटीव्ही कॅमेरे कार्यान्वित ठेवा
– सोसायटीत सुरक्षा रक्षक नेमा
– मुख्य दरवाजाला मजबूत कुलूप लावा
– रात्री बाहेरील दिवे सुरू ठेवा
– संशयित व्यक्तींवर लक्ष ठेवा
– स्थानिक पोलिसांना माहिती द्या
– प्रवासाची माहिती सोशल मीडियावर टाळा
