(pimpri chinchwad)-नवी सांगवीत ‘हातोडा’; तीन अनधिकृत आर.सी.सी. बांधकामे जमीनदोस्त!
महापालिकेच्या ‘ह’ क्षेत्रीय कार्यालयाची धडक कारवाई
पिंपरी-चिंचवड : पिंपरी-चिंचवड महानगरपालिकेने शहरातील अनधिकृत बांधकामे आणि अतिक्रमणांविरोधात आपली धडक मोहीम तीव्र केली आहे. ‘ह’ क्षेत्रीय कार्यालयाच्या हद्दीतील नवी सांगवी (प्रभाग क्र. ३१) परिसरात पालिकेच्या पथकाने धडक कारवाई करत तीन अनधिकृत आर.सी.सी. बांधकामे जमीनदोस्त केली. या धडक कारवाईमुळे परिसरातील भूमाफिया आणि अनधिकृत बांधकाम करणाऱ्यांचे धाबे दणाणले आहेत.
‘या’ भागात चालला पालिकेचा जेसीबी
नवी सांगवी येथील नेताजी नगर, गांगर्डे नगर, विनायक नगर आणि गजानन नगर या परिसरात कोणतीही अधिकृत परवानगी न घेता आर.सी.सी. बांधकामे उभारण्यात आली होती. पालिकेच्या पथकाने आज कारवाई करत अंदाजे १३० चौरस मीटर (सुमारे १४०० चौरस फूट) क्षेत्रफळावरील ही अनधिकृत बांधकामे हटवून जागा मोकळी केली.
कडक बंदोबस्तात कारवाई
महापालिका आयुक्त डॉ. विजय सूर्यवंशी यांच्या आदेशान्वये आणि ‘ह’ क्षेत्रीय अधिकारी पूजा दुधनाळे यांच्या थेट अधिपत्याखाली ही कारवाई अत्यंत चोखपणे पार पाडण्यात आली. कोणतीही कायदा व सुव्यवस्थेची परिस्थिती निर्माण होऊ नये यासाठी मोठा फौजफाटा तैनात करण्यात आला होता.
कारवाईतील पथक:
अधिकारी: उप अभियंता प्रताप मोरे, कनिष्ठ अभियंता जयवंत रोकडे.
धडक पथक: बीट निरीक्षक रोहन कांबळे, प्रफुल्ल भोकरे, सुरज माने.
मनुष्यबळ व यंत्रसामग्री: १८ महाराष्ट्र सुरक्षा बलाचे (MSF) जवान, १० मजूर, १ जे.सी.बी. आणि ३ ट्रॅक्टर ब्रेकरच्या साहाय्याने हे बांधकाम पाडण्यात आले.
“नियमांचे पालन करा, अन्यथा कठोर कारवाई!”
”पिंपरी-चिंचवड शहरातील अनधिकृत बांधकामे आणि अतिक्रमणांविरोधात महापालिका प्रशासनाची कारवाई यापुढेही अशीच सातत्याने सुरू राहणार आहे. नागरिकांनी कोणतेही बांधकाम करताना महापालिकेची रीतसर परवानगी घेऊनच बांधकाम करावे आणि नियमांचे पालन करावे. अनधिकृत बांधकाम किंवा अतिक्रमण केल्यास संबंधितांवर कायदेशीर व कठोर कारवाई करण्यात येईल, याची नोंद घ्यावी.”
– डॉ. विजय सूर्यवंशी, आयुक्त, पिंपरी-चिंचवड महानगरपालिका
