पुणे:
ग्राहकांच्या आरोग्याशी तडजोड करणाऱ्या आणि बेकायदेशीर अन्न उत्पादन करणाऱ्या अन्नमाफियांविरुद्ध अन्न व औषध प्रशासनाने (FDA) आक्रमक पाऊल उचलले आहे. अन्न व औषध प्रशासन आयुक्त तुकाराम मुंढे यांच्या मार्गदर्शनाखाली पुणे जिल्ह्यातील आंबेगाव व खेड तालुक्यात ५ वेगवेगळ्या ठिकाणी धडक छापे टाकण्यात आले. या धडक मोहिमेत तब्बल १९ लाख ३ हजार ३७९ रुपये किमतीचा गुटखा, विनापरवाना आटा-मैदा आणि भेसळयुक्त अन्नपदार्थांचा साठा जप्त करण्यात आला आहे.
या धडक कारवाईमुळे पुणे जिल्ह्यातील अन्नभेसळ करणाऱ्या आणि विनापरवाना व्यवसाय करणाऱ्या व्यापाऱ्यांचे धाबे दणाणले आहेत.
पहिल्या कारवाईतमंचरमध्ये गुटखा जप्त; ‘बीएनएस’ अंतर्गत गुन्हा दाखल
आंबेगाव तालुक्यातील मंचर येथे पोलिसांनी आणि प्रशासनाने मोठी कारवाई केली. येथील ‘साईराज पान अँड टी हाऊस’ तसेच ‘समीक्षा कोल्ड्रिंक जनरल अँड किराणा स्टोअर’ यांच्या पाठीमागील गोदामात बेकायदेशीरपणे लपवून ठेवलेला ३० हजार ३९५ रुपये किमतीचा गुटखा, पानमसाला आणि इतर प्रतिबंधित अन्नपदार्थ जप्त करण्यात आले. याप्रकरणी संबंधित आरोपींवर मंचर पोलीस ठाण्यात गुन्हे दाखल करण्यात आले आहेत.
दुसऱ्या कारवाईत खेमराज फूड इंडस्ट्रीजवर छापा; १० लाखांचा माल जप्त
मंचर येथीलच ‘खेमराज फूड इंडस्ट्रीज प्रायव्हेट लिमिटेड’ या नामांकित आस्थापनेची तपासणी केली असता, ही कंपनी कोणतीही अधिकृत परवाना नोंदणी न करता बेकायदेशीरपणे व्यवसाय करत असल्याचे उघड झाले. प्रशासनाने तेथून विक्रीसाठी ठेवलेला मैदा, बेसन, आटा आणि इतर अन्नपदार्थांचा तब्बल १९ हजार ८८६ किलोचा (किंमत १० लाख ४९ हजार ३६४ रुपये) साठा जप्त केला असून, त्याचे नमुने तपासणीसाठी प्रयोगशाळेत पाठवले आहेत.
तिसऱ्या कारवाईमध्ये खेड तालुक्यात ८ लाखांची ‘असुरक्षित’ सुपारी जप्त
खेड तालुक्यातील खालची भांबुरवाडी येथील ‘उज्वल सुपारी’ या आस्थापनेवरही प्रशासनाने विनापरवाना व्यवसाय केल्याप्रकरणी कारवाई केली. येथील विक्रीसाठी ठेवलेली सुपारी ही मानवी आरोग्यासाठी ‘अप्रमाणित आणि असुरक्षित’ असल्याच्या संशयावरून १ हजार ८९८ किलो वजनाचा आणि ८ लाख १६ हजार १४० रुपयांचा साठा जप्त करण्यात आला आहे.
चौथ्या कारवाईमध्ये वाटाण्याला कृत्रिम रंग! ‘ओम साई फरसाण’वर कारवाई
नरे येथील ‘ओम साई फरसाण’ या दुकानात ग्राहकांच्या आरोग्याशी थेट खेळ सुरू असल्याचा धक्कादायक प्रकार समोर आला. येथील ‘फ्राईड ग्रीन वाटाणा’ या खाद्यपदार्थाला अधिक हिरवेगार दाखवण्यासाठी घातक कृत्रिम रंगाचा वापर केला जात असल्याचे तपासणीत आढळले. प्रशासनाने ७ हजार ४८० रुपये किमतीचा ६८ किलो वाटाणा आणि कृत्रिम रंगाचे नमुने भेसळीच्या संशयावरून जप्त केले आहेत.
धडक कारवाई करणारे अधिकारी
पुणे विभागाचे सह आयुक्त (अन्न) दि.वा. भोगावडे यांच्या निर्देशानुसार आणि सहाय्यक आयुक्त नारायण सरकटे, प्रदीप आंबरे यांच्या उपस्थितीत ही मोहीम राबवण्यात आली. या पथकात अन्न सुरक्षा अधिकारी स्वाती मरके, सुप्रिया जगताप, संतोष सावंत, सतीश हाके, प्रकाश कचवे, लक्ष्मीकांत साळवे, अभिजीत झोडगे, आदित्य जोशी, साकेत सूर्यवंशी आणि नमुना सहाय्यक श्री. साळवे यांचा समावेश होता.
”नागरिकांनी तक्रारीसाठी पुढे यावे!”
“ग्राहकांच्या आरोग्याशी खेळ करणाऱ्या, निकृष्ट, भेसळयुक्त व बेकायदेशीर अन्न उत्पादन करणाऱ्या आस्थापनाविरुद्ध ही मोहीम अशीच तीव्र गतीने सुरू राहणार आहे. नागरिकांना कुठेही असा गैरप्रकार आढळल्यास त्यांनी तात्काळ प्रशासनाशी संपर्क साधून माहिती द्यावी.”
— अन्न व औषध प्रशासन, पुणे विभाग
