रुपाली चाकणकरांच्या जागी वैशाली नागवडे? राष्ट्रवादी काँग्रेसमध्ये मोठ्या संघटनात्मक बदलांची तयारी; देवगिरीवरील बैठकीत महत्त्वपूर्ण चर्चा
मुंबई : राष्ट्रवादी काँग्रेस पक्षात लवकरच मोठे संघटनात्मक बदल होण्याची शक्यता असून महिला प्रदेशाध्यक्षपदासह अनेक महत्त्वाच्या पदांवर नव्या नियुक्त्यांची तयारी सुरू असल्याची माहिती समोर आली आहे. उपमुख्यमंत्री सुनेत्रा पवार यांच्या ‘देवगिरी’ निवासस्थानी सोमवारी रात्री उशिरापर्यंत झालेल्या बैठकीत पक्षातील रिक्त पदे, फेरनियुक्त्या आणि संघटनात्मक पुनर्रचनेवर सविस्तर चर्चा करण्यात आली.
या बैठकीला सुनेत्रा पवार यांच्यासह पक्षाचे ज्येष्ठ नेते छगन भुजबळ, प्रफुल पटेल, सुनील तटकरे, पार्थ पवार आणि इतर वरिष्ठ नेते उपस्थित होते. पक्ष संघटनेला अधिक बळकट करण्यासाठी विविध पदांवर नवीन चेहऱ्यांना संधी देण्याबाबत बैठकीत चर्चा झाल्याचे सांगितले जात आहे.
दरम्यान, भोंदूबाबा अशोक खरात प्रकरणानंतर राष्ट्रवादी काँग्रेसच्या महिला प्रदेशाध्यक्षपदाचा राजीनामा देणाऱ्या रुपाली चाकणकर यांच्या जागी आता नवीन नेतृत्वाची निवड होण्याची शक्यता आहे. पक्षाच्या महिला प्रदेशाध्यक्षपदासाठी वैशाली नागवडे यांचे नाव आघाडीवर असल्याची जोरदार चर्चा राजकीय वर्तुळात सुरू आहे.
वैशाली नागवडे या सध्या राष्ट्रवादी काँग्रेस पक्षाच्या प्रदेश प्रवक्त्या म्हणून कार्यरत आहेत. त्याआधी त्यांनी राष्ट्रवादी महिला काँग्रेसच्या पुणे जिल्हाध्यक्ष आणि प्रदेश सरचिटणीस अशी महत्त्वाची पदे सांभाळली आहेत. पुणे जिल्ह्यातील दौंड तालुक्यात त्यांनी पक्ष संघटना मजबूत करण्यासाठी सक्रिय भूमिका बजावली आहे.
नागवडे यांनी 2017 आणि 2020 च्या जिल्हा परिषद निवडणुकांमध्ये राहू-खामगाव मतदारसंघातून राष्ट्रवादी काँग्रेसच्या उमेदवार म्हणून निवडणूक लढवली होती. संघटनात्मक काम, पक्षनिष्ठा आणि ग्रामीण भागातील सक्रिय संपर्क यामुळे त्यांचे नाव महिला प्रदेशाध्यक्षपदासाठी चर्चेत आले आहे.
विशेष म्हणजे 2022 मध्ये केंद्रीय मंत्री स्मृती इराणी यांच्या पुण्यातील कार्यक्रमादरम्यान झालेल्या गोंधळात वैशाली नागवडे यांना मारहाण झाल्याचा आरोप करण्यात आला होता. त्या प्रकरणात डेक्कन पोलीस ठाण्यात गुन्हाही दाखल झाला होता. या घटनेनंतर त्यांचे नाव राज्यभर चर्चेत आले होते.
पक्षातील सूत्रांच्या माहितीनुसार, महिला प्रदेशाध्यक्षपदाबरोबरच युवक आणि विद्यार्थी संघटनांमध्येही फेरबदल होण्याची शक्यता आहे. युवक प्रदेशाध्यक्षपदी निखिल ठाकरे यांची नियुक्ती होऊ शकते, तर विद्यार्थी संघटनेच्या अध्यक्षपदी आकाश झांबरे यांची निवड होण्याची शक्यता व्यक्त केली जात आहे.
राष्ट्रवादी काँग्रेस पक्ष आगामी स्थानिक स्वराज्य संस्था निवडणुका आणि भविष्यातील राजकीय आव्हाने लक्षात घेऊन संघटनेत नवचैतन्य आणण्याच्या तयारीत असल्याचे या बैठकीतून स्पष्ट झाले आहे. त्यामुळे येत्या काही दिवसांत पक्षाकडून अधिकृत नियुक्त्यांची घोषणा होण्याची शक्यता असून त्याकडे राज्याच्या राजकीय वर्तुळाचे लक्ष लागले आहे.
रुपाली चाकणकर यांच्या राजीनाम्यानंतर रिक्त झालेल्या महिला प्रदेशाध्यक्षपदावर अखेर कोणाची नियुक्ती होते, तसेच पक्षाच्या युवक आणि विद्यार्थी संघटनांची धुरा कोणाच्या खांद्यावर सोपवली जाते, याबाबतची उत्सुकता आता शिगेला पोहोचली आहे.
