दोन जणांवर उपचार चालू…प्रकृती चिंताजनक
पुण्याच्या हडपसर परिसरात ही दारू पिऊन पाच जणांचा मृत्यू
पिंपरी-चिंचवड : शहरातील फुगेवाडी परिसरात गेल्या दोन दिवसांत तब्बल १२ जणांचा गूढ मृत्यू झाल्याची धक्कादायक घटना समोर आली आहे. या घटनेमुळे संपूर्ण परिसरात भीतीचे वातावरण निर्माण झाले असून विषारी दारू प्यायल्याने हे मृत्यू झाल्याचा संशय व्यक्त केला जात आहे. दरम्यान, आणखी दोन जणांची प्रकृती अत्यंत चिंताजनक असून त्यांच्यावर रुग्णालयात अतिदक्षता विभागात उपचार सुरू आहेत.
मिळालेल्या माहितीनुसार, गुरुवारी पाच जणांचा मृत्यू झाला होता. त्यानंतर शुक्रवारी आणखी सात जणांचा मृत्यू झाल्याने खळबळ उडाली. मृत झालेल्या सर्वांनी एका ठिकाणाहून दारू प्राशन केल्याची माहिती स्थानिक नागरिकांनी दिली आहे. त्यामुळे विषारी दारूमुळेच हा प्रकार घडल्याचा संशय अधिक गडद झाला आहे. याच दरम्यान, पुण्यातील हडपसर परिसरातही कथित विषारी दारू प्राशनामुळे पाच जणांचा मृत्यू झाल्याची माहिती समोर आली आहे.
घटनेनंतर पोलिसांनी तातडीने तपास सुरू केला असून दारू पुरवठा करणाऱ्या एका संशयिताला ताब्यात घेतले आहे. परिसरातील अवैध दारू विक्रीच्या अड्ड्यांची चौकशी सुरू करण्यात आली आहे. मृतदेह शवविच्छेदनासाठी पाठवण्यात आले असून अहवाल आल्यानंतरच मृत्यूचे नेमके कारण स्पष्ट होणार असल्याचे प्रशासनाने सांगितले आहे.
मात्र, एवढी गंभीर घटना घडूनही पोलिसांकडून अधिकृत माहिती देण्यात उशीर होत असल्याने नागरिकांमध्ये संताप व्यक्त केला जात आहे. परिसरात अवैध दारू विक्री सुरू असतानाही पोलीस आणि राज्य उत्पादन शुल्क विभागाने दुर्लक्ष केल्याचा आरोप स्थानिक नागरिकांनी केला आहे. दोषींवर कठोर कारवाई करून अवैध दारू विक्री कायमची बंद करावी, अशी मागणी नागरिकांकडून करण्यात येत आहे.
घटनेचे गांभीर्य लक्षात घेता वरिष्ठ पोलीस अधिकाऱ्यांनी फुगेवाडी परिसराला भेट दिली असून कायदा व सुव्यवस्था राखण्यासाठी मोठा पोलीस बंदोबस्त तैनात करण्यात आला आहे. मृतांच्या कुटुंबीयांचा आक्रोश पाहून परिसरात शोककळा पसरली आहे. अनेक कुटुंबांचे आधारवड हरपल्याने हळहळ व्यक्त होत आहे.
