मुंबई(mumbai) : केंद्रीय मंत्री रामदास आठवले यांनी शिवसेना (उद्धव बाळासाहेब ठाकरे) पक्षप्रमुख उद्धव ठाकरे यांच्यावर टीका करताना, २०१९ मध्ये घेतलेल्या राजकीय निर्णयांमुळेच आज त्यांच्यावर ही परिस्थिती ओढवली असल्याचे म्हटले आहे.
‘ऑपरेशन टायगर’ संदर्भात प्रसारमाध्यमांशी संवाद साधताना आठवले म्हणाले की, २०१९ मध्ये भारतीय जनता पक्षासोबतची युती तोडून महाविकास आघाडी स्थापन करण्याचा निर्णय उद्धव ठाकरे यांनी घेतला. त्या निर्णयाचे परिणाम आज पक्षाला भोगावे लागत असून, शिवसेनेतील अनेक खासदार आणि नेते आता एकनाथ शिंदे यांच्या नेतृत्वावर विश्वास व्यक्त करत आहेत.
यावेळी आठवले यांनी राष्ट्रीय राजकारणावरही भाष्य केले. त्यांनी दावा केला की, काही विरोधी पक्षांतील सदस्य राष्ट्रीय लोकशाही आघाडी (एनडीए) सोबत येत आहेत. आगामी पावसाळी अधिवेशनात महिला आरक्षण विधेयकासह विविध महत्त्वाच्या विषयांवर एनडीएला दोन तृतीयांश बहुमताचा पाठिंबा मिळेल, असा विश्वासही त्यांनी व्यक्त केला.
