राजकीय वातावरण तापले;भररस्त्यात हायव्होल्टेज ड्रामा
पिंपरी, 18 मे : भोसरी विधानसभा मतदारसंघातील महापालिका प्रभाग ११ मध्ये समाविष्ट असलेल्या एका बागेत सुरू असलेल्या बेकायदेशीर धार्मिक बांधकामामुळे भाजपच्या विद्यमान आणि राष्ट्रवादी कॉंग्रेसच्या माजी लोकप्रतिनिधी एकमेकांसमोर आल्या. जाहीरपणे घोषणाबाजी करत थेट लोकांसमोरच लोकप्रतिनिधींसह माजी आमदाराचा एकेरी उल्लेख करण्यात आला. यामुळे सध्याचे आमदार महेश लांडगे यांनाही रस्त्यामध्येच तीव्र रोषाला सामोरे जावे लागले.
महापालिका प्रभाग ११ घरकूल परिसरात पालिकेचा सांडपाणी प्रक्रिया प्रकल्प कार्यरत आहे. या प्रकल्पाच्या परिसरात पाणथळ जागा, धावण्यासाठीचा मार्ग (जॉगिंग ट्रॅक) आणि जुनी-नवी मिळून घनदाट वृक्षवल्ली आहे. या ठिकाणी विविध पक्षी आणि सरपटणाऱ्या प्राण्यांचा मोठा वावर असतो. स्पाइन रस्ता आणि प्रभाग १० मधील संभाजीनगरच्या मध्यभागी हा परिसर येतो. या जागेवर गेल्या पाच महिन्यांपासून राष्ट्रवादी कॉंग्रेसच्या माजी महापौर मंगला कदम (सध्या त्यांचे सुपुत्र कुशाग्र कदम नगरसेवक आहेत) यांच्या पुढाकाराने जवळपास २५ गुंठे क्षेत्रावर धार्मिक स्थळ उभारण्याचे काम सुरू आहे. या कामाला प्रभाग ११ मधील आमदार महेश लांडगे यांच्या समर्थक असलेल्या नगरसेविका योगिता नागरगोजे यांनी तीव्र विरोध दर्शवला आहे.
‘या परिसरातील धावण्याच्या मार्गावर सकाळी आणि संध्याकाळी नागरिक व्यायामासाठी मोठ्या संख्येने येतात. तसेच पोलिस दलात भरती होण्यासाठी पूर्वतयारी करणारे जवळपास ३०० तरुण दररोज येथे धावण्याचा सराव करतात. त्यामुळे या ठिकाणी कोणतेही बेकायदेशीर काम होऊ दिले जाणार नाही.
असे नगरसेविका नागरगोजे यांचे म्हणणे आहे.
मुख्य म्हणजे, आमच्या कार्यक्षेत्रात मंगला कदम यांनी ढवळाढवळ करण्याचे काय कारण? बागेच्या आवारात कोणत्याही प्रकारचे नवे स्ट्रक्चर उभारू दिले जाणार नाही, अशी ठाम भूमिका योगिता नागरगोजे यांनी घेतली आहे. या कामासाठी सुमारे १० ते १५ मोठी झाडे तोडण्यात आल्याचा आरोपही त्यांनी केला.
या विषयावर बोलताना नागरगोजे म्हणाल्या, ‘‘बागेतील हे काम गेल्या पाच महिन्यांपासून सुरू आहे. निवडणूक प्रक्रिया पूर्ण झाल्यानंतर मी महापालिकेच्या अतिक्रमण विभागाला लेखी पत्र दिले. मात्र, ते हे काम उद्यान विभागाचे असल्याचे सांगत आहेत. उद्यान विभागाकडे विचारणा केली असता, ते स्थापत्य विभागाकडे बोट दाखवत आहेत. सर्वच विभाग एकमेकांवर जबाबदारी ढकलून वेळ मारून नेत आहेत. काल (शनिवारी) मी स्वतः महापालिका आयुक्तांची भेट घेऊन संपूर्ण परिस्थिती त्यांच्या कानावर घातली आहे. ते उद्या (सोमवारी) प्रत्यक्ष जागेवर येऊन पाहणी करणार आहेत. या ठिकाणी जॉगिंग ट्रॅक असून ३०० हून अधिक तरुण पोलिस भरतीचा सराव करतात. महत्त्वाचे म्हणजे, सार्वजनिक बागेच्या जागेत पक्के आरसीसी बांधकाम करण्यास कायद्याने मनाई आहे. आमच्या कार्यक्षेत्रात काय कामे करायची, याचा निर्णय आम्ही चारही स्थानिक लोकप्रतिनिधी मिळून घेऊ. बाहेरील व्यक्तींनी यात हस्तक्षेप करू नये.’’
…………..
आमदार लांडगे यांना रोखले
गेल्या दोन दिवसांपासून मंगला कदम आणि योगिता नागरगोजे यांच्यातील हा वाद अत्यंत विकोपाला गेला आहे. शनिवारी नागरगोजे यांनी सुरू असलेल्या कामाला प्रत्यक्ष विरोध केला. त्यानंतर रविवारी कदम यांनी आपल्या समर्थकांसह रस्त्यावर उतरून थेट आमदार महेश लांडगे यांना गाठले आणि जाब विचारला. आमदार लांडगे एका खाजगी कार्यक्रमाच्या निमित्ताने या भागातील एका सभागृहात आले होते. कार्यक्रम संपवून ते परतत असताना कदम यांनी त्यांना रस्त्यात रोखले आणि तीव्र शब्दांत सुनावले, ‘आम्ही अत्यंत प्रामाणिकपणे गेली १५ वर्षे तुमचे काम करत आहोत. येथील सर्व नागरिक तुम्हालाच मतदान करतात. तुम्हाला पूर्वकल्पना देऊन आणि विचारूनच हे काम सुरू करण्यात आले आहे. तुम्ही मला तसे पत्रही दिले होते. आता मात्र तुमची नगरसेविका सांगतेय की, महेशदादांनीच मला हे काम पाडायला सांगितले आहे. तुमच्या नावाचा वापर करून तिने प्रसिद्धीमाध्यमांशी संवाद साधला. मी तुम्हाला आधीच विचारले होते. आता मी हे काम पुढे करू की नको? मी विलास लांडे यांचा पराभव करण्यासाठी १५ वर्षे तुमच्या पाठीशी उभी राहिले’.
हा सर्व प्रकार सुरू असताना उपस्थित लोकांचे मोबाईल कॅमेरे चालू असल्याचे लक्षात येताच कदम यांनी ते बंद करायला लावले. या नाट्यमय घडामोडींमुळे पक्षांतर्गत चालणाऱ्या राजकीय खेळी समोर आल्या आहेत. तत्पूर्वी, कदम यांनी नागरगोजे यांच्या विरोधात जोरदार घोषणाबाजी केली, तसेच प्रभाग ११ मधील भाजपच्या एका लोकप्रतिनिधीचा एकेरी उल्लेखही केला.
