पिंपरी, दि. 26 (प्रतिनिधी) – ट्रॅव्हल्स कंपनीच्या नावाने बँक खाते उघडून देशातील 35 नागरिकांची सायबर फसवणूक करणार्या टोळीला सहकार्य केल्याप्रकरणी एकावर गुन्हा दाखल करण्यात आला आहे. हा प्रकार 11 जुलै 2025 ते 16 जानेवारी 2026 दरम्यान बँक ऑफ महाराष्ट्र, महाळुंगे शाखेत घडला.
सुशांत रवींद्र सोये (वय 29, रा. सारा सिटी, खराबवाडी, ता. खेड, जि. पुणे) व त्याच्या साथीदारांवर गुन्हा दाखल झाला आहे. पोलीस शिपाई राजेंद्र परमेश्वर खेडकर यांनी फिर्याद दिली आहे. पोलिसांनी दिलेल्या माहितीनुसार, आरोपीने साथीदारांशी संगनमत करून समर्थ टुर अॅन्ड ट्राव्हर्ल्स या नावाने बँक खाते उघडले. सायबर गुन्हेगारी टोळीचा सदस्य बनून त्याने देशभरातील 35 नागरिकांच्या फसवणुकीतील एक लाख 31 हजार 881 रुपयांचे बेकायदेशीर व्यवहार या खात्यावर करून घेतले. पुढील तपास दक्षिण महाळुंगे एमआयडीसी पोलीस करत आहेत.
