आषाढी वारीपूर्वी उपमुख्यमंत्री एकनाथ शिंदे यांची पंढरपूर दौरा; वारकऱ्यांच्या सुविधांची केली प्रत्यक्ष पाहणी
पंढरपूर (जि. सोलापूर) : प्रतिनिधी
आषाढी वारी २०२६ च्या पार्श्वभूमीवर उपमुख्यमंत्री एकनाथ शिंदे यांनी पंढरपूर येथे वारकऱ्यांसाठी प्रशासनाने उपलब्ध करून दिलेल्या सोयी-सुविधांची प्रत्यक्ष पाहणी केली. यावेळी त्यांनी वारकऱ्यांशी संवाद साधत त्यांच्या अडचणी जाणून घेतल्या तसेच विविध विभागांना आवश्यक सूचना दिल्या.
पत्रा शेड येथील रिद्धी-सिद्धी दर्शन मंडपात रांगेत उभ्या असलेल्या भाविकांना उपमुख्यमंत्री शिंदे यांनी स्वतःच्या हस्ते पाण्याच्या बाटल्यांचे वाटप केले. प्रशासनाने उभारलेल्या सुविधांबाबत त्यांनी भाविकांकडून थेट माहिती घेत समाधान व्यक्त केले.
यानंतर उपमुख्यमंत्र्यांनी चंद्रभागा नदीकाठावरील वाळवंट परिसरातील स्वच्छतेची पाहणी केली. आरोग्य विभागाच्या वतीने उभारण्यात आलेल्या वैद्यकीय कक्षाचे उद्घाटन त्यांच्या हस्ते करण्यात आले. त्यानंतर होडीद्वारे चंद्रभागा नदीपात्रातील स्वच्छता व्यवस्थेची पाहणी करून वारकऱ्यांच्या सुरक्षिततेला सर्वोच्च प्राधान्य देण्याच्या सूचना संबंधित अधिकाऱ्यांना दिल्या. स्वच्छता कर्मचाऱ्यांशी संवाद साधताना त्यांनी सुरक्षित साधनांचा वापर करून आरोग्याची काळजी घेण्याचे आवाहन केले.
भक्तीसागर येथे उभारण्यात आलेल्या आपत्कालीन आरोग्य केंद्रालाही त्यांनी भेट दिली. आयसीयूमध्ये उपचार घेत असलेल्या रुग्णांची विचारपूस करून त्यांच्या प्रकृतीची माहिती घेतली तसेच डॉक्टरांना आवश्यक सूचना दिल्या.
यावेळी सार्वजनिक आरोग्य मंत्री प्रकाश आबिटकर, महसूल राज्यमंत्री योगेश कदम, आमदार समाधान आवताडे, आमदार अभिजीत पाटील, आमदार राजू खरे, पंढरपूर नगराध्यक्ष प्रणिता भालके, अप्पर जिल्हाधिकारी गणेश निऱ्हाळी, उपविभागीय अधिकारी सचिन इथापे, मंदिर समितीचे कार्यकारी अधिकारी राजेंद्र शेळके, मुख्याधिकारी महेश रोकडे तसेच संबंधित अधिकारी व पदाधिकारी उपस्थित होते.
