मुंबई : रायगड जिल्ह्यातील आरसीएफ (RCF) कंपनीच्या मरीन आउटफॉल लाईनमुळे निर्माण झालेल्या अडचणी दूर करण्यासाठी आवश्यक उपाययोजनांचा सविस्तर आढावा मत्स्यव्यवसाय व बंदरे मंत्री नितेश राणे यांच्या अध्यक्षतेखाली मंत्रालयात घेण्यात आला. या बैठकीत स्थानिक मच्छीमारांच्या समस्या, पायाभूत सुविधा आणि प्रलंबित प्रकल्पांबाबत सविस्तर चर्चा करण्यात आली.
या बैठकीत थळ-नवगाव परिसरातील मच्छीमार बांधवांसाठी आवश्यक सुविधा उपलब्ध करून देणे, तसेच मरीन आउटफॉल लाईनमुळे निर्माण झालेल्या अडथळ्यांवर उपाय म्हणून आवश्यक चॅनेल आणि संरक्षण बंधारा उभारण्याबाबत चर्चा झाली. संबंधित कामे तातडीने मार्गी लावण्यासाठी आवश्यक कार्यवाही करण्याच्या स्पष्ट सूचना मंत्री नितेश राणे यांनी अधिकाऱ्यांना दिल्या.
नवेदार-नवगाव मत्स्य जेट्टी प्रकल्पाचा आढावा
मौजे नवेदार-नवगाव येथील प्रस्तावित मत्स्य जेट्टी प्रकल्पाचाही बैठकीत आढावा घेण्यात आला. स्थानिक मच्छीमारांसाठी ही जेट्टी अत्यंत महत्त्वाची असून तिच्या कामातील प्रलंबित बाबींचा सविस्तर विचार करण्यात आला.
तसेच अलिबाग येथील रेवस–मांडवा प्रवासी जेट्टी प्रकल्पाच्या प्रलंबित मुद्द्यांवरही चर्चा करण्यात आली. या दोन्ही प्रकल्पांची सद्यस्थिती तपासून रखडलेली कामे वेगाने पूर्ण करण्याचे निर्देश मंत्री राणे यांनी दिले.
प्रकल्पांना गती देण्याचे निर्देश
स्थानिक मच्छीमार, प्रवासी आणि नागरिकांच्या सोयीसाठी महत्त्वाच्या असलेल्या पायाभूत सुविधा प्रकल्पांना प्राधान्य देण्यात यावे, असे मंत्री नितेश राणे यांनी स्पष्ट केले. प्रलंबित कामे लवकरात लवकर पूर्ण करून स्थानिकांना दिलासा देण्यासाठी सर्व संबंधित विभागांनी समन्वयाने काम करावे, असेही त्यांनी सांगितले.
दरम्यान, रायगड जिल्ह्यातील मच्छीमारांच्या समस्या सोडवण्यासाठी प्रशासनाने तातडीने पावले उचलावीत, असे निर्देशही मंत्री नितेश राणे यांनी या बैठकीत दिले.
