‘निर्मलवारी-समृद्धवारी’ उपक्रमाचा पंढरपुरात समारोप; स्वच्छतादूत, डॉक्टर आणि स्वयंसेवकांचा मुख्यमंत्र्यांच्या हस्ते गौरव
पंढरपूर : ग्रामविकास व पंचायत राज विभागातर्फे राबविण्यात आलेल्या ‘निर्मलवारी-समृद्धवारी’ तसेच मुख्यमंत्री वैद्यकीय सहायता कक्षाच्या ‘चरणसेवा’ उपक्रमाचा समारोप मुख्यमंत्री देवेंद्र फडणवीस यांच्या प्रमुख उपस्थितीत पंढरपूर येथे झाला. यावेळी स्वच्छ भारत अभियानात महाराष्ट्राने देशात प्रथम क्रमांक मिळवल्याबद्दल संचालक शेखर रौंदळ यांचा तसेच चरणसेवा उपक्रमात सहभागी डॉक्टर, सेवाभावी संस्था आणि आषाढी वारीतील स्वच्छतादूतांचा सन्मान करण्यात आला. याच कार्यक्रमात ‘स्वच्छ सर्वेक्षण ग्रामीण २०२६’ या मोहिमेच्या बोधचिन्हाचे अनावरणही करण्यात आले.
यावेळी मुख्यमंत्री फडणवीस म्हणाले की, ‘चरणसेवा’ उपक्रमातून डॉक्टर आणि स्वयंसेवकांनी वारकऱ्यांची आई-वडिलांप्रमाणे सेवा केली. थकलेल्या भाविकांना वैद्यकीय मदत देत मानवतेचे आणि महाराष्ट्र धर्माचे दर्शन घडविले. ही सेवा म्हणजे देशाच्या युवा शक्तीचे प्रेरणादायी उदाहरण असल्याचे त्यांनी सांगितले.
मुख्यमंत्र्यांनी सांगितले की, संत ज्ञानेश्वर महाराज आणि संत तुकाराम महाराज पालखी सोहळ्यासह इतर दिंड्यांसाठी मोठ्या प्रमाणावर सुविधा उभारण्यात आल्या. वारीदरम्यान १३ लाख चौरस फूट जर्मन हँगर, ५ हजार फिरती शौचालये तसेच स्वच्छतेसाठी व्यापक यंत्रणा कार्यरत होती. ‘निर्मलवारी’ यशस्वी करणारे स्वच्छतादूत हे खऱ्या अर्थाने देवदूत आहेत, असे गौरवोद्गार त्यांनी काढले.
पुढे बोलताना त्यांनी सांगितले की, चंद्रभागा नदी परिसर आणि वाळवंट स्वच्छ ठेवण्यासाठी विशेष नियोजन करण्यात आले. लाखो वारकरी पंढरपुरात दाखल होऊनही शहर स्वच्छ राहिले, ही प्रशासन आणि स्वच्छतादूतांच्या संयुक्त प्रयत्नांची मोठी उपलब्धी आहे.
यावेळी मुख्यमंत्र्यांनी लोकप्रतिनिधी, पुणे, सातारा आणि सोलापूर जिल्हा प्रशासन, पोलीस यंत्रणा, विविध विभागांचे अधिकारी-कर्मचारी, निर्मलवारीसाठी जनजागृती करणारे कलाकार तसेच वारी यशस्वी करण्यासाठी योगदान देणाऱ्या सर्व घटकांचे विशेष कौतुक केले.
कार्यक्रमाला जलसंपदा व आपत्ती व्यवस्थापन मंत्री गिरीश महाजन, ग्रामविकास मंत्री व पालकमंत्री जयकुमार गोरे, आमदार राजेंद्र राऊत, गोपीचंद पडळकर, समाधान आवताडे, अभिजीत पाटील, विजयकुमार देशमुख, नारायण पाटील, नंदकिशोर महाजन, माजी आमदार प्रशांत परिचारक, जिल्हा परिषद अध्यक्ष दीपक वैद्य, विभागीय आयुक्त शितल तेली-उगले, जिल्हाधिकारी एस. कार्तिकेयन, मुख्य कार्यकारी अधिकारी कुशल जैन, जिल्हा पोलीस अधीक्षक अतुल कुलकर्णी तसेच मुख्यमंत्री वैद्यकीय सहायता कक्षाचे प्रमुख रामेश्वर नाईक यांच्यासह अनेक मान्यवर उपस्थित होते.
