पिंपरी, दि. १५ (प्रतिनिधी) – निगडी पोलीस ठाण्याच्या हद्दीमध्ये एका व्यक्तीला बेकायदेशीरपणे विक्रीसाठी गांजा बाळगल्याप्रकरणी गुन्हा दाखल करण्यात आला आहे. ही कारवाई गुरुवारी (दि. १४ मे) रोजी दुपारी दळवीनगर झोपडपट्टी, पत्राशेड, म्हसोबा मंदिराजवळ करण्यात आली.
या प्रकरणात पोलीस शिपाई संतोष बिभीषण सपकळ (नेमणूक अंमली पदार्थ विरोधी पथक, गुन्हे शाखा, पिंपरी चिंचवड) यांनी गुरुवारी (दि. १४ मे) रोजी निगडी पोलीस ठाण्यात फिर्याद दिली आहे. त्यानुसार आरोपी प्रकाश तुकाराम शिंगे (वय ३५, ओटा स्कीम, निगडी) असे गुन्हा दाखल करण्यात आलेल्या आरोपीचे नाव आहे. पोलिसांनी दिलेल्या माहितीनुसार, गुरुवारी दुपारी आरोपी प्रकाश शिंगे हा त्याच्या ताब्यात एकूण २० हजार ६०० रुपये किमतीचा ४०६ ग्रॅम वजनाचा गांजा हा अंमली पदार्थ बेकायदेशीरपणे विक्रीसाठी बाळगताना रोख रकमेसह आढळून आला. या गांजाबाबत त्याच्याकडे अधिक चौकशी केली असता, त्याने हा माल ओटा स्कीम येथील सपना साठे नावाच्या महिलेकडून विक्रीसाठी आणल्याचे सांगितले. निगडी पोलीस याबाबत अधिक तपास करत आहेत.
