नवी दिल्ली | प्रतिनिधी : नीट पेपरफुटी प्रकरण आणि शिक्षण व्यवस्थेत सुधारणा करण्याच्या मागणीसाठी कॉकरोच जनता पार्टी (CJP)च्या नेतृत्वाखाली जंतरमंतर येथे सुरू असलेले आंदोलन सोमवारी संसद मार्चदरम्यान तणावपूर्ण झाले. या पार्श्वभूमीवर पक्षाचे संस्थापक अभिजीत दीपके यांनी मंगळवारीही संसद मार्च सुरू ठेवण्याची घोषणा केली आहे.
संसद मार्चदरम्यान झालेल्या हिंसाचाराच्या प्रकरणी दिल्ली पोलिसांनी कनॉट प्लेस, पार्लियामेंट स्ट्रीटसह विविध पोलिस ठाण्यांमध्ये आतापर्यंत पाच एफआयआर नोंदवले असून, आणखी काही गुन्हे दाखल होण्याची शक्यता आहे. सीसीटीव्ही फुटेजच्या आधारे संबंधितांची ओळख पटविण्याचे काम सुरू असल्याची माहिती पोलिसांकडून देण्यात आली आहे.
दरम्यान, आंदोलनात सहभागी असलेले सामाजिक कार्यकर्ते सोनम वांगचुक यांच्या प्रकृतीबाबत २१ जुलै रोजी सकाळी आरोग्यविषयक माहिती प्रसिद्ध करण्यात आली. त्यानुसार त्यांचे आवश्यक आरोग्य निर्देशक सध्या स्थिर असले, तरी रक्तातील साखरेची पातळी कमी असल्याचे नमूद करण्यात आले आहे.
या आंदोलनाच्या पार्श्वभूमीवर जंतरमंतर आणि संसद परिसरात कडक सुरक्षा व्यवस्था तैनात करण्यात आली असून, दिल्लीतील परिस्थितीवर पोलिस आणि प्रशासनाकडून बारकाईने लक्ष ठेवले जात आहे.
