पिंपरी-चिंचवड:
पिंपरी-चिंचवड महापालिकेने आपल्या क्षेत्रीय कार्यालयांना प्रतापगड, राजगड, सिंहगड आणि रायगड अशी महाराष्ट्राच्या स्वाभिमानाची प्रतीके असलेल्या गडकिल्ल्यांची नावे दिली आहेत. या नावांचा प्रत्येक मराठी माणसाला सार्थ अभिमान आहेच, परंतु केवळ नावे बदलल्याने जनतेचे प्रश्न सुटणार नाहीत. “शिवरायांच्या नावाचा वापर केवळ राजकीय दिखाव्यासाठी न करता, त्या कार्यालयांतून शिवशाहीसारखा भ्रष्टाचारमुक्त आणि गतिमान कारभार कधी मिळणार?” असा सवाल आम आदमी पार्टी युवक आघाडीचे प्रदेश उपाध्यक्ष ऋषिकेश कानवटे यांनी उपस्थित केला आहे.
नावे बदलली, पण भ्रष्ट नियत कधी बदलणार?
दलाली आणि टक्केवारी कधी थांबणार?: आजही सामान्य नागरिकांना साध्या साध्या कामांसाठी महापालिकेचे उंबरठे झिजवावे लागतात. तिथे दलाली, टक्केवारी आणि ‘फाइल अडवून ठेवण्याची’ जुनीच पद्धत सुरू आहे.
हेलपाट्यातून मुक्ती कधी?: डिजिटल इंडियाच्या गप्पा मारल्या जात असल्या, तरी एका सहीसाठी नागरिकांना दहा वेळा हेलपाटे मारावे लागतात. गडकिल्ल्यांचे नाव असलेल्या कार्यालयात जर जनतेची पिळवणूक होत असेल, तर हा महाराजांच्या आदर्शांचा अपमान आहे.
आज्ञेचे उल्लंघन: छत्रपती शिवाजी महाराजांनी ‘रयतेच्या भाजीच्या देठालाही हात लावू नका’ अशी आज्ञा दिली होती. मात्र, आज शिवरायांच्या नावाने चालणाऱ्या कार्यालयांत सामान्य माणसाकडून वसुलीचे प्रकार घडत असल्याच्या तक्रारी येत आहेत.
फक्त बोर्ड बदलून विकास होत नसतो. बोर्डावर नाव ‘रायगड’ असेल आणि आत जर भ्रष्टाचार चालत असेल, तर हे महाराष्ट्राचे दुर्दैव आहे. सत्ताधाऱ्यांनी शिवरायांच्या नावाचा वापर व्होट बँकेसाठी करण्यापेक्षा, त्या नावाचा आदर राखून कार्यालयातील भ्रष्टाचार मुळापासून उपटून टाकावा.”
— ऋषिकेश कानवटे, प्रदेश उपाध्यक्ष, ‘आप’ युवक आघाडी
’आप’ युवक आघाडीच्या प्रमुख मागण्या:
– प्रत्येक क्षेत्रीय कार्यालयात तक्रार निवारण यंत्रणा अधिक सक्षम करावी.
– भ्रष्ट अधिकाऱ्यांवर तात्काळ व कठोर कारवाई व्हावी.
– ‘काम वेळेत न झाल्यास जबाबदार अधिकाऱ्याला दंड’ हा अधिकार नागरिकांना मिळावा.
नागरिकांना आवाहन:
‘आप’ युवक आघाडीने पिंपरी-चिंचवडकरांना आवाहन केले आहे की, महापालिकेच्या कामात जर तुम्हाला भ्रष्टाचार किंवा दलालांचा त्रास होत असेल, तर आता गप्प बसू नका. नागरिक गप्प बसले तर भ्रष्ट व्यवस्था कधीच बदलणार नाही, म्हणूनच या ‘दिखाव्याच्या’ राजकारणाविरुद्ध आवाज उठवण्याची वेळ आली आहे!
