Delhi-जंतर-मंतर आंदोलनामुळे नवी दिल्लीत वाहतूक कोंडी; दिल्ली पोलिसांकडून महत्त्वाच्या वाहतूक सूचना जारी
नवी दिल्ली(delhi) : जंतर-मंतर येथे सुरू असलेल्या कॉकरोच जनता पार्टी (CJP) च्या आंदोलनामुळे नवी दिल्ली परिसरात मोठ्या प्रमाणावर गर्दी झाल्याने वाहतुकीवर मोठा परिणाम झाला आहे. परिस्थिती लक्षात घेऊन दिल्ली पोलिसांनी नागरिकांसाठी महत्त्वाच्या वाहतूक सूचना जारी करत शक्यतो नवी दिल्लीच्या दिशेने अनावश्यक प्रवास टाळण्याचे आवाहन केले आहे.
दिल्ली पोलिसांनी दिलेल्या माहितीनुसार, आंदोलनाच्या ठिकाणी मोठ्या संख्येने आंदोलक आणि नागरिक उपस्थित असल्यामुळे अनेक प्रमुख मार्गांवर वाहतूक मंदावली असून काही ठिकाणी ती पूर्णपणे विस्कळीत झाली आहे. परिणामी, शहरातील महत्त्वाच्या रस्त्यांवर मोठ्या प्रमाणात वाहतूक कोंडी निर्माण झाली आहे.
सोशल मीडिया प्लॅटफॉर्म ‘एक्स’वर प्रसिद्ध करण्यात आलेल्या सूचनेत दिल्ली पोलिसांनी नागरिकांना नवी दिल्ली परिसरात जाणे शक्यतो टाळण्याचे आवाहन केले आहे. अत्यावश्यक कारणास्तव प्रवास करावाच लागल्यास पर्यायी मार्गांचा वापर करावा, जेणेकरून वाहतूक कोंडीत अडकण्याचे टाळता येईल, असे पोलिसांनी म्हटले आहे.
याशिवाय, वाहतूक सुरळीत ठेवण्यासाठी नागरिकांनी पोलिस प्रशासनाला सहकार्य करावे, वाहतूक नियमांचे काटेकोर पालन करावे आणि शक्य असल्यास सार्वजनिक वाहतूक व्यवस्था तसेच दिल्ली मेट्रोचा वापर करावा, असेही आवाहन करण्यात आले आहे.
जंतर-मंतर परिसरात आंदोलन सुरू असल्याने पुढील काही काळ वाहतुकीवर परिणाम होण्याची शक्यता व्यक्त करण्यात आली असून, नागरिकांनी प्रवासापूर्वी वाहतुकीची अद्ययावत माहिती तपासूनच प्रवासाचे नियोजन करावे, असे दिल्ली पोलिसांनी स्पष्ट केले आहे.
